यलय् मल्लकालीन ढाल ब्वज्या

यल(नेपालभाषा टाइम्स)- वंगु कौलाथ्व सप्तमि (फुलपाति)कुन्हु थनया तलेजुइ तलेजु भवानीया द्यः कुहां बिज्याकेगु ज्या जुल । थुगुसी द्यः कुहां बिज्याकेगु झ्वलय् झण्डै झिंस्वदँ लिपा मल्लकालीन युद्धया इलय् छ्यलीगु ढाल नं पिथनाः ब्वज्या याःगु खः ।

कौलाथ्व सप्तमिकुन्हु द्यः कुहां बिज्याकेगु झ्वलय् द्यःयात गर्भगृहं पित हयाः दशैं घरय् तःगु खःसा व हे इलय् झिंस्वदँ लिपा मल्लकालीन ढाल नं पित हःगु खः । द्यः कुहां बिज्याकूगु इलय् दकलय् न्ह्यःने थ्व हे मल्लकालीन ढाल ज्वनाः वःगु खः । तलेजु (तुलजा) भवानीया ढाल कथं कयातःगु उगु ढाल जीर्ण अवस्थाय् थ्यंगुलिं छुं दँ न्ह्यःनिसें द्यः कुहां बिज्याइगु इलय् पित हयेगु बन्द यानातःगु खः ।

तसकं जीर्ण अवस्थाय् थ्यंगुलिं २०६६ सालनिसें ढाल पित हयेगु बन्द यानातःगु खःसां उकिया प्रतीककथं ढालया छपा किंकिंपा जक द्यः कुहां बिज्याइलय् नापं हयेगु यानाच्वंगु खः ।

मूल स्थानय् थापं यायेधुंकल कि ढालयात सर्वसाधारणयात क्यने मजिउ धइगु मान्यता दुसा सप्तमि व चालंकुन्हु जक सर्वसाधारणयात क्यनेगु याना वयाच्वंगु दु ।