मुख्यमन्त्री राईं प्रदेशया नां तये फइला ?

येँ – प्रदेश नं. १ या मुख्यमन्त्री राजेन्द्र राईं विश्वासया मत ला कयादिल, तर प्रदेशया नां तयेगु ज्याय् नं थथे हे बहुमत खाके फइ ला धइगु खँय् धाःसा शंका ब्वलंगु दु । गठबन्धनया घटक नेपाली कांग्रेस दुने मन्त्री जुइपिं अप्वयाः सरकार चले यायेत समेत थाकुइगु सम्भावना दुगुलिं वय्कलं प्रदेशया नां तयेगु ज्याय् सफलता चूलाकी धइगु खँय् आंशका ब्वलंगु खः ।

वय्कः स्वयां न्ह्यः प्रदेशय् निगू सरकार वयेधुंकूगु दु । तर निगुलिं सरकारं नां तयेगु सम्बन्धी प्रस्ताव तकं टेबुल मयाः । तर मुख्यमन्त्री राईं धाःसा नामाकरण सम्बन्धी प्रस्ताव टेबुल यायेगु खँ धयादीगु दु ।

प्रदेशया नां पहिचानय् आधारित जुयाः तयेगु धाःसां आः तक नां धाःसा प्रस्तावित जूगु मदुनि । अनया पहिचान–वादीतय्सं प्रदेशया नां ‘लिम्बुवान किरात खम्बुवान’ तयेकाः धकाः माग यानाच्वंगु दुसा पहिचान विरोधीतय्सं ‘सगरमाथा प्रदेश’ धइगु नां न्ह्यःने हयाच्वंगु दु ।

थ्वहे झ्वलय् प्रदेश १ या आर्थिक मामिला तथा योजनामन्त्री इन्द्रबहादुर आङबों प्रदेश झिला न्ह्यःया अवस्थाय् दुगु टिप्पणी यानादीगु दु । आङबोयात तत्कालीन मुख्यमन्त्री शेरधन राईं २०७७ पुस ११ गते पदमुक्त याःगु खः । म्हिगः पत्रकारतलिसे खँ ल्हासें मन्त्री आङबों धयादिल, ‘जि सरकारं पिहां वनेधुंकाः प्रदेशया अवस्था गन खः अन हे दु ।’

वय्कलं राई नेतृत्वया सरकारं गति कायेमफुगु धासें धयादिल, ‘म्हिगः गुगु अवस्थाय् जिं त्वःता वनागु खः व स्वयां छपलाः हे न्ह्यःने वनाच्वंगु मदु, थौंया न्हि तक थ्यंबलय् छुं हे गति काःगु मदु, बरु भौतिक पूर्वाधारया क्षेत्रय् आपालं क्षति जूगुलिं लागत अप्वइगु जूगु दु ।’

सम्बन्धित बुखँ

LEAVE YOUR COMMENTS