ने. सं. ११४६ बछलाथ्व दुतिया -

येँया उपप्रमुखयात किपुलिइ हना

किपू (नेपालभाषा टाइम्स)- येँ महानगरपालिकाया उपप्रमुख सुनिता डंगोलं महानगरपालिकाय् विचाः याःथें ज्या याये उलि अःपु मजूगु खँ धयादीगु दु । ज्या याये अःपु मजूसां असम्भव नं मजूगु खँ धयादीगु दु ।

वंगु शनिवाः येँ महानगर उपप्रमुख डंगोलयात किपुलिइ जूगु हनेज्याझ्वलय् नवासें वय्कलं उगु खँ धयादीगु खः । ज्याझ्वलय् नवासें वय्कलं थःगु न्यादँया कार्यकालय् थम्हं फक्व येँया विकास यायेगु ल्याखं थीथी योजनात न्ह्यःने हयाः ज्या यानाच्वनागु नं धयादीगु दु । वय्कलं विकासया ज्याय् सकसिनं थःथःगु थासं ग्वाहालि ययोत व हःपाः बियादीत नं इनाप यानादिल ।

येँ महानगरपालिकाया उपप्रमुख डंंगोलयात वंगु शनिवाः थनया हिल टाउन स्कुलय् जूगु छगू ज्याझ्वलय् येँ महानगर उपप्रमुख डंगोलयात हंगु खः । थगुने किपूया थीथी वडाय् जूगु उद्घोषण तालिमय् प्रशिक्षण बियादीम्ह उपप्रमुख डंगोलयात तालिमय् ब्वति कयादीपिं प्रशिक्षार्थीतय्सं हनेज्या याःगु खः ।

थःपिंत तालिम बियादीम्ह प्रशिक्षक येँ महानगरपालिकाया उपप्रमुख थेंज्याःगु गरिमामय पदय् निर्वाचित जुयादीगु लसताय् प्रशिक्षार्थीपिंसं सिन्हः तिकाः खादा क्वाखायेकाः नापं भिंतुना पौ व लुमन्ति चिं देछासे हनेज्या याःगु खः ।

ज्याझ्वलय् किपू नगरपालिकाया निवर्तमान उपप्रमुख सरस्वति खड्कां येँ व किपू दथुइ अन्तर नगरपालिका साझेदारी ज्याझ्वःकथं किपूयात ग्वाहालि यानाच्वंगु खँ न्ह्यथनादिसें उकियात निरन्तरता बियादीत इनाप यानादिल ।

किपू नगरपालिकाया निवर्तमान नगर प्रमुख रमेश महर्जनं येँ महानगर उपप्रमुख डंगोलं न्हापा छुं नं पदय् मदुगु इलय् नं भाषा व लिपिया उत्थानया निंतिं नेवाः ख्यलय् योगदान बिया वयाच्वनादीगु खँ कनादिसें आः पदय् वयेधुंकाः उकियात अझ च्वन्ह्याका यंकेत इनाप यानादिल ।

सम्मानित व्यक्तित्व महानगर उपप्रमुख डंगोलं प्रशिक्षणय् प्राप्त ज्ञानयात कयाः उद्घोषणया क्षेत्रय् न्ह्याः वनेत प्रशिक्षार्थीतय्त इनाप यासें पदीय दायित्वया कारणं नाप लानाच्वने मखंसां थः दुने किपूया मतिना व विश्वास न्ह्याबलें दयाच्वनी धयादिल ।