मातृभाषां शिक्षाय् सरकारया दायित्व ,निरन्तर अनुगमन जुयाच्वनेमाः
येँ – शिक्षा विधेयक संशोधन यानाः आः मातृभाषां नं माध्यमिक तगिं तकया शिक्षा काये दइगु जुल धकाः हःगु प्रावधानयात कार्यान्वयन यायेगु खःसा निरन्तर हे अनुगमन याना च्वने माःगु खँ धाःगु दु । भाषा आन्दोलनया न्ह्यलुवा पद्मरत्न तुलाधरं थःत नापलाः झाःम्ह शिक्षामन्त्री गिरिराजमणि पोखरेललिसे खँ ल्हासें थ्व सुझाव बियादीगु खः ।
प्यन्हुजालय् सदनय् मातृभाषां आखः ब्वंकेगु दायित्व राज्ययागु नं जुइ धकाः व्यवस्था यानातःगु विधेयक संसदं पारित जुइवं मन्त्री पोखरेल लाजिम्पाट झायाः भाजु तुलाधरयात नापलानादीगु खः । उगु हे इलय् वय्कलं सदनय् मातृभाषा शिक्षाया दायित्व सरकारयागु नं जुइ धइगु प्रावधानसहितया विधेयक पारित जूगु ‘भिंगु खँ’ तुलाधरयात न्यंकादीगु खः ।
मन्त्री पोखरेलं ‘शिक्षा ख्यलय् छुं हे ज्या मयासे छितः गथे नापलाः वये थें जूगुलिं थौं मातृभाषा शिक्षाया खँ नं दुगु विधेयक पारित यानाखतं छिथाय् वयागु’ धासें भाजु तुलाधरयात जंक्वया भिंतुना बियादीगु खः ।
उगु इलय् भाजु तुलाधरं नेपालय् भाषिक अधिकार सम्बन्धी आन्दोलन वामपन्थीतय्सं हे सुरु याःगु खँ न्ह्यथँसें वामपन्थीतय्सं सतकय् च्वनाः भाषिक समानताया आन्दोलन याःसां सरकारय् वनीबलय् धाःसा उकियात पूवंके मफुगु खँ कनादिल ।
लिसें आः पास जूगु विधेयकयात लागिं मन्त्री पोखरेलयात सुभाय् देछासें आः नं थुकियात पारित याकेगु सवालय् यक्व समस्या वयेफु उकिं निरन्तर अनुगमन यायेमाःगु खँ कनादीगु खः ।
विधेयकया मस्यौदा तयार याः–बलय् उकी अंग्रेजी व नेपाली भासं शिक्षा बीगु दायित्व जक सरकारयागु जुइ धकाः न्ह्यथनातःगु खः । लिपा सदनय् संशोधन प्रस्ताव दर्ता यानाः उकी अंग्रेजी व नेपाली जक मखु थःथःगु मातृभाषां शिक्षा बीगु नं राज्यया दायित्व जुइ धकाः थपे याःगु खः।
संस्कृत शिक्षाया खँ कायम दनि
शिक्षा मन्त्रीं तयार याःगु शिक्षा सम्बन्धी विधेयकयात संशोधन यानाः उकी मातृभाषां आखः ब्वंकेगु दायित्व नं सरकारयागु हे जुइ धकाः थपे याकेगु ज्याय् नेवाः न्ह्यलुवा लिसें संघीय समाजवादी फोरमया सांसद राजेन्द्र श्रेष्ठं विशेष पहल यानादीगु खः ।
वय्कलं हे मातृभाषां शिक्षा बीगु दायित्व राज्ययागु नं जुइ धइगु संशोधन प्रस्ताव दर्ता यासें शिक्षामन्त्री गिरिराजमणि पोखरेलयात नापलानाः लबिङ यानादीगु खः । थ्व विधेयकय् मातृभाषां आखः ब्वंकेगु राज्यया दायित्व जुइ धइगु व्यवस्था दुथ्याकूसां संस्कृत शिक्षायात विशेष प्राथमिकता बीगु मेगु प्रावधान धाःसा यथावत दनिगु खँ धाःगु दु ।
LEAVE YOUR COMMENTS