स्वनिगलय् जक ५५ प्रतिशत संक्रमित

येँ (नेपालभाषा टाइम्स) – स्वनिगलय् कोरोना भाइरस संक्रमण जूपिनिगु ल्याः झनझन अप्वया वनाच्वंगु दु। म्हिगः येँय् जक १४३१ म्ह, ख्वपय् १४८द म्ह व यलय् १२३ म्हेसित संक्रमण पुष्टि जूगु खः ।

म्हिगः संक्रमण पुष्टि जूपिं मध्ये ५५ प्रतिशत संक्रमित स्वनिगलय् जक पहिचान जूगु खः । स्वनिगः पिने १७०२ म्हेसित संक्रमण पुष्टि जूगु खः । म्हिगः जक देय्न्यंकं ३०९३ म्हेसित कोरोना भाइरस संक्रमण पुष्टि जूगु दु। देय्न्यंकंया प्रयोगशालाय् जूगु १३८६१ म्हेसिया परीक्षण जूगु खः । उकि मध्ये ४.४८ मध्ये छम्हेसित संक्रमण पुष्टि जूगु खः ।

थुकिया लिसे नेपालय् १ लाख ३९ हजार १२९ म्ह कोरोना भाइरस संक्रमण पुष्टि जूगु दु। संक्रमण जूपिं मध्ये ९६ हजार ६०९ म्ह संक्रमण मुक्त जूगु स्वास्थ्य तथा जनसंख्या मन्त्रालयया प्रवक्ता डा. जागेश्वर गौतम जानकारी बियादीगु दु ।

म्हिगः जक २ हजार १०८ म्ह संक्रमण मुक्त जूगु जानकारी नं डा. गौतमं बियादीगु दु। नेपालय् थौंकन्हय् ४१ हजार ७७५द म्ह कोरोना भाइरसया संक्रिय संक्रमित दुगु खँ मन्त्रालयं धाःगु दु। म्हिगः जक च्याम्ह कोरोना भाइरस संक्रमित सीगु खँ स्वास्थ्य मन्त्रालयं धाःगु दु। थुकिया लिसे सीपिनिगु ल्याः ७६५ म्ह थ्यंगु दु ।

थ्वहे झ्वलय् स्वास्थ्य तथा जनसंख्या मन्त्री भानुभक्त ढकालं नागरिकयात गुणस्तरीय सेवाय् पहुँच दयेकेत सहज यायेगु जनताया माग कथं निजी क्षेत्रया समझदारी व साझेदारीइ शुल्क पुलेफुपिं व्यक्तियात सशुल्क सेवा उपलब्ध याकेगु सरकारं निर्णय याःगु खँ धयादीगु दु। म्हिगः वय्कलं छगू पत्रकार सम्मेलन यानाः उगु खँ धयादीगु खः ।

सम्बन्धित बुखँ

LEAVE YOUR COMMENTS