एकता राष्ट्रिय अभियानय् ब्वति कायेगु : वामदेव

येँ (नेपालभाषा टाइम्स) – नेपाल कम्युनिष्ट पार्टीया उपाध्यक्ष बामदेव गौतमं विभाजित मजुसें नेकपा एकता राष्ट्रिय अभियानय् संगठित जुइत अपिल यानादीगु दु। ‘नेपाल कम्युनिष्ट पार्टी (नेकपा) एकता राष्ट्रिय अभियान’ या संयोजकया रुपय् म्हिगः छगू विज्ञप्ति सार्वजनिक यासें नेकपाया नेता कार्यकर्तापिंत वय्कलं धयादीगु दु, ‘छिकपिं गन गन दु, उगु हे थासं नेकपा एकता अभियानया नामं संगठन दयेकादिसं व विभाजनय्व नाच्वंपिं कमरेडपिंत थुइकेगु कुतः यानादिसं ।’

वय्कलं छुं छगू पुचःया नेतापिंत ब्वःबीगु शैली विरोध मयायेत व छेँय् वइपिंत नं फयांफछि सम्मान यानाः समाजवादी शैली नालेत नं इनाप यानादीगु दु । संसद विघटन धुंकाः नेकपा ओली व प्रचण्ड-नेपाल पक्षय् विभाजित जुयाच्वंगु दुसा गौतम धाःसा पार्टी तछ्याये मजिउ धासें तटस्थ च्वना वयाच्वनादीगु खः । वय्कलं नेकपा एकता यायेमाःगु खँय् बः बिया वयाच्वनादीगु खः ।

वय्कलं म्हिगः पिकाःगु प्रेश विज्ञप्तिइ न्ह्यथनातःगु दु, ‘पार्टीया एकता ल्यंकेत वा हाकनं एकीकरण यायेगु आज्जु कयाः नेकपाया उपाध्यक्ष जुयाच्वनाम्ह जि वामदेव गौतम निगुलिं पुचःयात समर्थन मयासें नेपाल कम्युनिष्ट पार्टी (नेकपा) एकता राष्ट्रिय अभियानया संयोजक जुयाः देय् व विदेशय् च्वंपिं फुक्कं पार्टी दुजःपिं, समर्थक शुभचिन्तकपिंत हार्दिक अपिल यासें छिकपिनि न्ह्यःने दँ वयागु दु। पार्टी विभाजनय् ब्वति काइपिं वा विभाजनया नेतृत्व याइपिं सु नं नेतायात यदि पुनः एकीकरणया अवस्थाय् सामेल मजुल धाःसा व लोकतान्त्रिक मूल्यमान्यताय् आधारि समृद्ध समाजवाद निर्माणयात समर्थन याइपिं नेपाःमि जनतां गुबलं क्षमा बीमखु ।’

वय्कलं थःगु धयाादी, ‘छम्हं मेम्हेसिया दोष बियाः, सामान्य मान मर्यादा उल्लंघन यासें थःगु ऐतिहासिक योगदानयात दाउलय् तयाः देश व विदेशया कम्युनिष्ट विरोधीपिंत न्हिकाः शुरु जूगु लडाइँ बन्द यानादिसं, लिहां झायादिसं, हाकनं मिले जुइगु वातावरण दयेके व द्वलंद्वः सहिदया बलिदानं विकास जूगु झित यःगु पार्टीयात ज्यानाः पुनर्गठन याये, ऐतिहासिक शिक्षा कयाः पार्टीयात व्यवस्थित कथं न्ह्याकेगु व पार्टी ब्वलंगु फुक्कं कथंया अन्तरविरोधयात पार्टी पद्धति कथं सम्मान जनक रुपं ज्यंकेनु ।’

गौतमं सरकार सञ्चालनया छगू कार्यकाल पूमवंसें व पार्टी एकीकरण जूगु स्वदँ नं ई मवंनेगु नेकपा विभाजनं क्षतविक्षत जुइगु लँपुइ वनाच्वंगु खँ तकसं दुःख व पीडादायी खँ जूगु खँ नं विज्ञप्तिइ धयातःगु दु । पार्टी दुने ब्वलंगु समस्या पार्टी दुने हे ज्यंके मफयेवं मुक्कं राष्ट्रयात प्रभावित याइगु संस्था प्रतिनिधि सभायात दुरुपयोगु यायेगु ज्या नं तसकं पीडादायी जूगु खँ नं न्ह्यथनातःगु दु ।