ने. सं. ११४६ चाैलागा एकादशी - बरूथनी एकादशि / ख्वयपू यःसिं थनेगु

चोलेन्द्र सर्वोच्च वने दइ कि दइ मखु ?

येँ (नेपालभाषा टाइम्स)-संसदपाखें महाभियोग लगे यानाः निलम्बन यानातःम्ह प्रधानन्यायाधीश आः हानं ज्याय् लिहां वने फइ लाकि फइ मखु धइगु कानुनी न्ह्यसः पिहां वःगु दु । वय्कः आः सर्वोच्च अदालत लिहां वनाः ज्या याये फइ वा फइ मखु धइगु विषयय् कानूनविद्तय् राय विभाजित जूगु दु ।

वय्कःयात गुगु संसदं महाभियोग प्रस्ताव तःगु खः उगु संसद हे विघटन जुइधुंकूगु कारणं आः वय्कःयात तयातःगु महाभियोगया प्रस्ताव नं स्वतः खारेज जूगु राय छथ्वः कानूनविद्तय्सं तयाच्वंगु दुसा मेथ्वःसिनं धाःसा थ्व संसद भंग जूसां थ्व संसदं याःगु ज्यायात आः चुनाव लिपा वइगु संसदं क्वबिया यंकीगु जूगुलिं महाभियोग खारेज मजूनि धइगु तर्क तया हःगु दु ।

आः संसद भंग जुइधुंकूगु कारणं थ्व संसदय् उत्पत्ति जूगु महाभियोग प्रस्तावयात मेगु संसदं क्वबिया यंकी लाकि यंकी मखु धइगु विवाद पिहां वःगु कारणं आः मेगु हे छुं उपाय याये माली धइगु सुझावत नं वःगु दु ।

छुं कानूनविद्तय्सं आः थुकिया बारे सर्वोच्च अदालतय् हे छगू मुद्दा तयाः थुकिया बारे छु याये माली धकाः राय काःसा बांलाइ धकाः सुझाव बिउगु दु । अथे जुल धाःसा सर्वोच्चं फैसला मयाःतले फुक्कं अवस्था स्थगित जुइगु व सर्वोच्चं बीगु राय सकसितं मान्य नं जुइगु बिचाः उमिसं तःगु दु ।
अथे हे गुलिसिनं अध्यादेश हयाः निलम्बनय् लाःम्ह प्रधानन्यायाधीश ज्याय् लिहां वये दइ मखु धकाः कानून हे दयेकाः जबरायात पनेगु ज्या याये माली धकाः नं सुझाव तयाहःगु दु । तर अध्यादेशया सुझावयात संवैधानिक कानूनया ज्ञातातय्सं धाःसा गलत सुझाव धकाः आलोचना याःगु दु । छम्ह मनूयात पनेगु लागिं अध्यादेश हयेबलय् उकिं कन्हय् गलत नजिर स्थापना जुइगु चिउताः उमिसं प्वंकूगु दु ।

मेखे प्रमुख प्रतिपक्षी एमालें संसद भंग जुइवं चोलेन्द्र शम्शेरया महाभियोग नं खारेज जुल धासें वय्कःयात ज्या याके बीमाःगु बिचाः न्ह्यःने तया हःगु दु । एमालें अज्याःगु बिचाः तयेवं राष्ट्रपति विद्यादेवी भण्डारीं नं म्हिगः संविधान दिवसया ज्याझ्वलय् जबरायात बहालवाला प्रधानन्यायाधीशया हे मान्यता बिसें ब्वनापौ छ्वया बिउगु दु ।

आः सभामुख निर्णायक
निलम्बित प्रधानन्यायाधीश चोलेन्द्र शम्शेर जबरा छुं जुयाः ज्याय् लिहां वनेगु कानूनसम्मत हे खँ खःसां वय्कःयात उकिया लागिं संसद सचिवालयपाखें पत्र ला बीमाःगु जुइ । अज्याःगु पत्र तक हे मकासे जबरा ज्याय् लिहां वनेगु पाय्छि मखु धइगु खँय् सकलें सहमत दु । आः वय्कःयात अज्याःगु पत्र बीम्ह मनू धइम्ह विघटित संसदया सभामुख अग्नि सापकोटा हे जक खः ।

सभामुख सापकोटां वय्कःया निलम्बन फुकुवा जुल धकाः पौ च्वःसा जक वय्कः वहे पौ ज्वनाः ज्याय् लिहां वने खनी । यदि पौ मच्वल धाःसा पौ मवःतले वय्कः ज्याय् लिहां वने खनी मखु । उकिं थ्व इलय् वय्कःया बारे निर्णय याइम्ह निर्णायक व्यक्ति सभामुख सापकोटा जुयाच्वंगु खँ धाःगु दु । सरकारं धाःसा वय्कःयात तयातःगु निगरानी अझं जारी हे यानातःगु दनि ।