पोखराय् तायामचा प्याखं कासा क्वचाल
येँ(नेपालभाषा टाइम्स)÷नेवाः खलः कास्कीया आह्वानय् नयाँबजार सांस्कृतिक समिति, नयाँबजारया ग्वसालय् पर्यटकीय नगरी पोखराय् जूगु तायामचा प्याखं धेंधेंबल्लाः कासाय् मिजंपाखें बागबजार बगर तायामचा समिति बागबजाः व मिसापाखे लामाचौर नेवाः खलः, लामाचौर न्हाप लाःगु दु । खलःया आह्वानय् वंगु शनिवाः जूगु कासाय् मिजंपाखे रानिपौवा तायामचा नाच समिति, रानिपौवा लिउ, गोपाल जि मन्दिर सेवा समिति, रामकृष्ण टोल लियांलिउ व गै¥हापाटन नेवाः समाज, गै¥हापाटनं हःपाः सिरपाः त्याकूगु दु ।
अथे हे मिसापाखे समाज कल्याण नेवाः खलः राजाको चौतारो लिउ, रुपा देउराली नेवाः खलः रुपा गाउपालिका लियांलिउ लायेत ताःलाःगु दु ।
मिजंपाखे झिंगूगु व मिसापाखे गुंगू यानाः मुक्कं गुंगू यानाः मुक्कं नीच्यागू पुचलं ब्वति काःगु कासाय् मिजंपाखे न्हापयात स्वंगू लख छतका, लिउयात निगू लख छतका, लियांलिउयात छगू लख छतका व हःपाःयात झिद्वः व छतका दां सिरपाःलिसें दसिपौ लःल्हाःगु खः । थुकथं हे मिसापाखे न्हापयात न्यय्द्वः, लिउयात स्वीद्वः व लियांलिउयात नीद्वः तका दांलिसे दसिपौ लःल्हाःगु खः ।
कासाया उलेज्या मूपाहां पोखरा महानगरपालिकाया प्रमुख धनराज आचार्यं यानादीगु खःसा समापन ज्याझ्वलय् मूपाहांकथं झायादीम्ह नेवाः देय् दबूया नायः पवित्र वज्राचार्यं सिरपाः त्याकादीगु पुचःयात शिल्ड, दसिपौ व दां लःल्हानादीगु खः ।
निसःत्या दँ पुलांगु इतिहास कुबिया च्वंगु पोखराया तायामचा प्याखं सापारुया लसताय् लाकाः ग्वसाः ग्वःगु खः । उगु इलय् पोखराय् नेवाः वस्ती स्वनेगुलिसें नेवाःतय्सं थःपिंसं ज्वना वःगु सांस्कृतिक सम्पदा संरक्षण, ल्याय्म्ह पुस्तायात हस्तान्तरण यायेगु ल्याखं थुकथं तायामचा कासा ग्वसाः ग्वया वयाच्वनागु नेवाः खलः कास्कीया नायः अशोक पालिखें कनादीगु दु ।
तायामचा प्याखनय् ब्वति काइपिं कलाकार (नृत्यकार) व वाद्यवादक सकलें ल्याय्म्हत हे जक जूगुलिं थ्व प्याखं ल्याय्म्ह पुस्ताय् हस्तान्तरण जुइधुुंकूगु व थुकिं प्याखं संरक्षण जुइ धइगु खँय् थः विश्वस्त दु धयादिल ।
कासा ग्वसाः खलः मूल समितिया संयोजक शम्भुलाल श्रेष्ठं ज्याझ्वः ताःलाकेत थःथःगु थासं ग्वाहालि यानादीपिं सकलसित आभार प्वंकादिसें कासाया उद्देश्य परापूर्वकालनिसें प्रचलनय् दुगु मौलिक नेवाः संस्कृति कुबियाच्वंगु तायामचा प्याखं संरक्षण यायेगु, परम्परागत व मौलिक संस्कृतिया माध्यमं पर्यटकयात आकर्षित यायेगु खः धयादिल । गण्डकी प्रदेश संग्रहालय रोड, शिव गणेश मार्गय् सुथसिया ८ ताः इलंनिसें न्ह्याःगु कासा झिघौलं मल्याक न्ह्याःगु खः ।
खलःया पुलांम्ह मूछ्याञ्जे सुविन्द्र श्रेष्ठया संयोजकत्वय् दुगु स्वम्हेसिया मूल्यांकन समितिं मूल्यांकन यानाः विजयी पुचः घोषणा याःगु खः ।
LEAVE YOUR COMMENTS