जलवायु परिवर्तनयात कयाः गोष्ठि

यल(नेपालभाषा टाइम्स)- बौद्ध महिला संघया ग्वसालय् जलवायु परिवर्तन व थुकिं लाकाच्वंगु लिच्वःयात कयाः छगू गोष्ठि जुल । संघया अध्यक्ष सुुजाता मानन्धरया सभापतित्वय् जूगु ज्याझ्वलय् मूछ्याञ्जेलिसें क्षमता अभिवृद्धि उपसमितिया कजि चन्द्रदेवी शाक्यं ज्याझ्वः बारे जानकारी बियादिसें लसकुस यानादीगु खः ।

ज्याझ्वलय् वातावरणविद् रत्नमान शाक्यं जलवायु परिवर्तनया वर्तमान अवस्था बारे जानकारी बियादीगु खः । वय्कलं जलवायु परिवर्तनया मुख्य कारक सवारी साधन, उद्योग, कल कारखाना, अप्पा भट्टा आदि जूगुलिं थुकियात नियन्त्रणया याये हथाय् जूगु व उकिया निंतिं याकनं पहल न्ह्याकेमाःगु खँय् बः बियादिल ।

मेम्ह विज्ञ अनिल तुलाधरं विश्वय् न्ह्यानाच्वंगु थीथी कथंया युद्ध, उपनिवेश व अप्वया वनाच्वंगु उद्योग धन्दाया कारणं ध्वस्त जुया वनाच्वंगु वातावरणयात सुधार यायेत व्यावहारिक ज्ञान दकलय् महत्वपूर्ण जूगु विचाः तयादिल ।

वातावरणविद् भूषण तुलाधरं जलवायु परिवर्तनया कारणं वातावरणया हरेक ख्यलय् लिच्वः लाका यंकाच्वंगु धासें वातावरणया दक्वं पक्षयात छगू छगू यानाः सुधार याना यंकेमाःगु हथाय् जुइधुंकूगु धयादिल । लिसें वय्कलं वातावरण प्रदूषण पनेगु निंतिं आवंनिसें कुतः मयायेगु खःसा थुकी मानव जक मखु प्राणी मात्रया जीवन हे खतराय् लायेफुगु धासें सचेत यानादिल ।

थुकथं हे मेम्ह विज्ञ अमिता तुलाधरं वातावरणय् लिच्वः लाकीगु लः, फय्यात फक्व यचुपिचु याना तये फत धाःसा प्राणी मात्रया जीवन दीर्घकालीन रुपय् व्यतित जुइगु मखुसा जलवायु परिवर्तनया हे कारणं मेगु प्रलय वइगु सम्भावना दु धायदिल ।

सम्बन्धित बुखँ

LEAVE YOUR COMMENTS