प्रदेशया नां व राजधानी ल्ययेत अझं सकस
येँ – देय्या न्हय्गू प्रदेशत मध्ये आः तक छगू प्रदेश बाहेक मेगु प्रदेशं राजधानी व प्रदेशया नां क्वःछी फयाच्वंगु मदुसा उकिया निंतिं सत्तारुढ पार्टी दथुइ हे तःधंगु समस्या जुयाच्वंगु खँ सीदुगु दु । थःगु नां कने चाहे मजूम्ह प्रदेश नम्बर ३ या छम्ह सांसदं कनादी कथं प्रदेश बारे आः पार्टीं जक निर्णय यायेफइगु खनेदु ।
वय्कःया कथं पार्टीं निर्णय यात धाःसा थुकिं सांसदतय्सं छुं नं कथंया भूमिका म्हिते फइ मखु । थ्व केवल ३ नम्बर प्रदेशया जक समस्या धाःसा मखु । प्रदेशया स्थानीय जनतां बाहुल्यताया आधारय् प्रदेशया नां तयेमाः धयाच्वंगु दुसा मेखे पार्टीया लाइन धाःसा जातीय पहिचानया आधारय् प्रदेशया नां तये मदु धकाः वयाच्वंगु दु ।
अथे जुयाः प्रदेश व राजधानीया नां क्वःछी धकाः खुगुलिं प्रदेशं धयाच्वंसां नं प्रदेशया नां क्वःछीत समस्या जुयाच्वंगु खनेदु । मेखे गुलिखे प्रदेशया राजधानी क्वःछीबलय् थःपिनिगु राजनीति यायेत तकं समस्या वयेफइगु जुयाः नं थीथी कथंया लबिङ जुयाच्वंगु खँ सीदुगु दु ।
विशेषतः ३ नम्बर प्रदेशया राजधानी हेटौंडायात दयेकल धाःसा मेगु गुंगू जिल्लाया सांसदतय् राजनीति हे समस्याय् लायेफइगु सम्भावना दुसा हेटौंडा वा चितवनयात राजधानी दयेके मफुत धाःसा मुख्यमन्त्री डोरमणि पौडेल लगायत चितवनया सांसदतय् राजनीति समाप्त जुइ फइगु जूगुलिं हे मुख्यमन्त्री पौडेलं हेटौंडायात हे राजधानी दयेकेमाः धकाः लबिङ यानाच्वंगु हुइनाभुइना नं जुयाच्वंगु दु ।
मेखे प्रदेशया राजधानीया निर्णय यायेगु अधिकार संविधान कथं प्रदेश संसदयात बियातःगु दु । तर पार्टीया हाइकमाण्डं अनौपचारिक रुपं ह्विप जारी यायेफइगु खँ नं उम्ह सांसदं कनादीगु दु । वय्कःया कथं यदि ३ नम्बर प्रदेशया राजधानी हेटौंडाय् तयेमाः धकाः पार्टीं अनौपचारिक ह्विप जारी यात धाःसा हेटौंडा बाहेकया सांसदतय्सं मतदानय् ब्वति मकासे सुम्क च्वने फइगु सम्भावना दु ।
अथे हे पार्टीं हेटौंडा बाहेक मेथाय् राजधानी दयेकल धाःसां नं हेटौंडा व चितवनया सांसदत सुम्क च्वनेफइगु सम्भावना दु । सांसदतय्त विरोधय् मवँसे मौन तक च्वनेगु सुविधा धाःसा पार्टीपाखें बीगु खँ नं धाःगु दु ।
LEAVE YOUR COMMENTS