कार्यकारिणी अधिकार प्रयोग मयासे च्वनेगु उचित मखु

येँ(नेपालभाषा टाइम्स)- येँ महानगरपालिका प्रमुख बालेन्द्र शाहं थःके दुगु अधिकार प्रयोग मयासे सुम्क च्वना च्वने मजिउ धयादीगु दु । येँ महानगरया थीथी थासय् अनधिकृत व नक्सा पास अःखः निर्माणलिसें मेगु हे प्रयोजनया निंतिं प्रयोग जुयाच्वंगु संरचना थुनेगु ज्या न्ह्याका वयाच्वंगु सम्बन्धय् छगू पे्रस विज्ञप्ती जारी यासें उगु खँ धयादीगु खः ।

थःके दुगु कार्यकारिणी अधिकार प्रयोग मयासे अकर्मण्यताया अवस्थाय् च्वना च्वनेगु उचित जुइमखु धइगु थःगु दृढ मान्यता दुगु वय्कलं धयादीगु दु ।

नेपाःया संविधान व कानूनं हे महानगरपालिकायात कानूत दयेकेगु व्यवस्थापकीय अधिकार, कानून कार्यान्वयनया कार्यकारिणी अधिकार व विवाद निरुपण यायेगु थेंज्याःगु न्यायिक अधिकार लःल्हानातःगु दु धासें अनधिकृत निर्माण व सार्वजनिक सम्पत्ति अतिक्रमण पनेत व नियन्त्रण यायेगु प्रयोजनया निंतिं महानगर प्रहरी बल परिचालन यानागु विज्ञप्तीइ धयातःगु दु ।

प्रमुख शाहं जारी यानादीगु विज्ञप्तीइ धयातःगु दु, ‘कार्यकारिणीया अकर्मण्यतापाखे ब्वलनीगु दण्डहीनताया अवस्था यानाः थौं भयावह समस्यात ब्वलंगु दु । उकिं न्यायिक निरुपण लिपा जक अनधिकृत संरचना चिइकेमाः धयागु खँयात येँ महानगरपाखें कार्यकारिणी अधिकारया प्रयोग गुगु चरणय् जुइ व न्यायिक अधिकार प्रयोगया अधिकार नं गुगु चरणय् जुइ धयागु खँ थुइकेत इनाप यानाच्वना ।’

अनधिकृत निर्माण, सार्वजनिक थाय्या अतिक्रमण, नक्सा पास अःखःया संरचना निर्माण व प्रयोग थेंज्याःगु गैरकानूनी ज्यायात थप निरन्तरता बीगुयात पनेत थम्हं मूलत रोकथाम व निण्न्त्रण सम्बन्धी कारवाही न्ह्याकागु वय्कःया धापू दु ।