मेयरया म्ह्याय्पाखें प्लाज्मा दान

येँ (नेपालभाषा टाइम्स) – येँ महानगरपालिकाया मेयर विद्यासुन्दर शाक्यया म्ह्याय् पलिस्था शाक्यं प्लाज्मा दान यानादीगु दु । कोरोना भाइरस संक्रमित व निमोनियापाखें पीडितपिनिगु निंतिं प्लाज्मा थेरापीया निंतिं प्लाज्मा दान याइगु खः । कोरोना संक्रमिततय् उपचारया निंतिं कोरोना संक्रमण जुइधुंकूपिनिगु जक प्लाज्मा काइगु खः । मेयर शाक्यया म्ह्याय् पलिस्थायात नं कोरोना संक्रमण जुइधुंकूगु दु । मेयर शाक्ययात कोरोना संक्रमण जूबलय् हे वय्कःया जहानयात नं संक्रमण जूगु खः ।

पलिस्थां येँया कान्तिपुर अस्पताल वनाः प्लाज्मा दान यानादीगु खः । वय्कलं बियादीगु प्लाज्मां ओम नर्सिङ होमय् वासः याकाच्वनादीम्ह ७६ दँया ज्याथियात उपचार याइगु खँ धाःगु दु । थ्वहे दथुइ मेयर शाक्यं थः म्ह्याय् नं प्लाज्मा दान याःगु खँ कनादिसें आवश्यक जुल धाःसा थःम्हं नं दान यायेगु खँ धयादीगु दु । लिसें वय्कलं कोरोनाया कारणं तच्वयेक बिरामी जूपिनि जीवनया निंतिं प्लाज्मा थेरापी तसकं महत्वपूर्ण जूगु धासें कोरोना संक्रमित जुइधुंकूपिंत प्लाज्मा दान यानादीत इनाप नं यानादीगु दु ।