राज्य जक मखु पार्टी नं संघीय ढाँचाया जुइमाः

येँ – समाजवादी पार्टीया सहअध्यक्ष राजेन्द्रप्रसाद श्रेष्ठं संघीय व्यवस्थाय् राज्य जक मखसे पार्टी नं संघीय ढाँचाया जुइमाःगु खँ धयादीगु दु । संघीय व्यवस्थाय् एकात्मक सोचं पार्टी चले यायेत स्वत धाःसा उकिं दुर्घटना ब्वलनीगु वय्कलं धयादिल ।

संघीय संसदया सांसद तकं जुयादीम्ह सहअध्यक्ष श्रेष्ठं राज्यं संघीयतायात कमजोर यायेत स्वल धकाः धायेगु तर पार्टी संचालन यायेबलय् अन्तरिम विधा, संगठनात्मक सिद्धान्त, कार्य पद्दति छुं नं मस्वसे संस्थागत परिपाटीयात हाचां गायेगु व स्वच्छेचारी धंगं न्ह्याः वनेगु खत धाःसा समाजवादी पार्टी नं नेकपा व कांग्रेस स्वयां छुं फरक जुइमखु धयादिल ।

‘पार्टीइ थः स्वयां क्वय् च्वंगु समितिइ हुकुमी शासन मखु, लोकतान्त्रिक विकेन्द्रीता सिद्धान्त कथं चेन अफ कमान्डया रुपय् चले यायेमाः’ वय्कलं पहिचानया आन्दोलनपाखें विमखु जुइत स्वइगु प्रवृत्तियात कयाः आलोचना यासें धयादिल, ‘संविधानं मबिउगु पहिचानसहितया संघीयता तत्काल प्राप्त जुइमखु, उकिं झासं आः स्वायत्त प्रदेश मखु संविधानं व्यवस्था याःगु स्वायत्त क्षेत्रया माग तयाः न्ह्याः वनेगु स्वयेमाः ।’

वय्कलं न्ह्यःने धयादिल, ‘सांस्कृतिक स्वायत्त क्षेत्रया जक माग यायेगु पहिचानया आन्दोलनयात समग्रताय् थुइके मफुगुया परिणाम खः ।’ संघीयताविद्या रुपय् तकं नांजा:म्ह नेता श्रेष्ठं नेपाःया संविधानया धारा ५६ (५) य् राजनीतिक अधिकार विनाया विशेष संरचनाया जक व्यवस्था यानातःगु व थ्व नं अल्पसंख्यक व सीमन्तकृत समुदायया सामाजिक, सांस्कृतिक संरक्षण व आर्थिक विकासया निंतिं जक जूगु धासें संवैधानिक व्यवस्थायात बांलाक अध्ययन हे मयासे उत्पीडित राष्ट्रियतातय्गु मागयात गलत दिशापाखें यंकेत स्वइगु प्रवृत्तिं पहिचानया आन्दोलनयात धक्का लाइ धयादिल ।

पहिचानया आन्दोलनं दीर्घकालीन रुप काल धकाः उकिया विकल्प मालेगु हानिकारक जुइ धासें वय्कलं भारतय् गुजरात, नागाल्याण्ड १०-१५ दँया दथुइ प्राप्त जूगु व बिस्कं तेलंगाना राज्य दयेकेत ७० दँया ई काःगु धासें आन्दोलनया गतिइ नं थ्व निर्भर जुइ धयादिल ।

नेता श्रेष्ठं सिमा पालेबलय् छक्वः पालेवं सिमा क्वःदइमखु, तर प्रत्येक प्रहारं सिमा क्वःथलेत योगदान बी धासें सन् १९८० निसें गोर्खाल्याण्डया निंतिं आन्दोलन शुरु जूगु व आन्दोलनकारीतय्सं बिस्कं गोर्खाल्याण्ड राज्यया माग मत्वःतूगुलिं हे उकिया सह उपलब्धिकथं १९८८ लय् दार्जिलिब गोर्खा हिल काउन्सिल प्राप्त यायेत सफल जूगु खः धयादिल ।

सम्बन्धित बुखँ

LEAVE YOUR COMMENTS