नेकपाया निगुलिं पुचलं दावी मयाःलिं निर्वाचन आयोग अन्यौलय्

येँ – सत्तारुढ दल नेपाल कम्युनिष्ट पार्टी कुचा जुल धकाः स्वयम् पार्टीया नेतातय्सं हे दावी यानाच्वंसां निर्वाचन आयोगं धाःसा पार्टी कुचा जूगु खँयात आः तक स्वीकार याःगु मदुनि । आयोगं नेकपा विभाजन जुल धकाः आः तक स्वीकार मयाःगुया कारण खः, विभाजन जूगु निगू मध्ये गुगुं हे कुचां आः तक थःपिं बहुमतय् दु धकाः आयोगया ज्याकुथी दावी याः मवःगु ।

निगुलिं पार्टीपाखें थःपिंसं यानागु निर्णयया जानकारी जक आयोगयात बिउ वल, तर थःपिं बहुमतय् दु धकाः लिखित दावी याः वःगु मदुनि । आयोगं निगुलिं पार्टीयात अज्याःगु दावी याः वयेगु लागिं इनाप याःसां निगुलिं पुचः उखेपाखे मवंगु कारणं निर्वाचन आयोगं आःतक नेकपा विभाजन हे जूगु मदुनि धकाः निर्णय याःगु खः ।

निगुलिं पार्टीं अथे दावी याः मवंगु छाय् ले ? थुकिया बारे सम्बद्ध पार्टीया नेतातय्सं धाः कथं थःपिंके बहुमत दु धकाः सुनां दावी याः वनी वयात आयोगं न्हूगु पार्टीया रुपय् दर्ता याना बी । सम्बद्ध सूत्रं धाः कथं बहुमत दु धकाः दावी याः वंगुया अर्थ थः पुलांगु पार्टीपाखें अलग्ग जुयाः वये धुन, थःपिंत न्हूगु पार्टी माल धकाः माग याःगु जुइ । तर आयोगं न्हूगु पार्टीया रुपय् दर्ता याना बिल धाःसा चुनाव चिं, ध्वाँय् व लोगो नं न्हूगु हे कायेमाली ।

थौंकन्हय् ओली पुचः व नेपाल– दाहाल निगुलिं पुचलं थःपिं हे आधिकारिक पार्टी खः धासें चुनाव चिं सुद्र्यः व पार्टीया लोगो दावी यानाच्वंगु दु । निगुलिं पुचलं थःपिं पार्टी विभाजन यानाः वयापिं मखु धकाः दावी यानाच्वंगु दु । निगुलिं पुचलं थःपिंत पार्टीया रुपय् मान्यता माल धकाः नं आयोगय् धाः वंगु मदुनि । सूत्रया कथं नेपाल–दाहाल पुचलं छुं ई न्ह्यः बहुमत दुजःतय् हस्ताक्षर ज्वनाः अथे दावी याः वनेगु तयारी नं याःगु खः । तर दावी यात धाःसा न्हूगु पार्टी बिया हइगु खँ थुइवं दथुइ हे रोके जूगु खः ।

आयोगया निर्णयं सुयात फाइदा ?
निर्वाचन आयोगं नेकपा विभाजन जूगु हे स्वीकार मयासे म्हीग याःगु निर्णयं आखिर सुयात फाइदा जुइ ? आः वयाः बहस थुखे केन्द्रित जूगु दु । ओली व नेपाल– दाहाल निगुलिं पुचलं आयोगया थ्व ‘तटस्थ’ च्वनेगु निर्णयपाखें थःपिंत फाइदा जुइगु दावी याःगु दु । नेपाल पुचःयाके बहुमत दुसां निर्णय वयागु पक्षय् मवंगुलिं ओली पक्षं सन्तोषया सासः ल्हाःगु दुसा निर्वाचन आयोगं नेकपाया केन्द्रीय दुजःतय् संख्या ४४१ जक खः धकाः स्वीकार याःगुलिं नेपाल पुचलं सन्तोषया सासः ल्हाःगु दु ।

केन्द्रीय दुजःया संख्या ४४१ धाःगुया अर्थ भविष्यय् थ्वहे ४४१ या बहुमतं याःगु निर्णय स्वीकार याये धाःगु खः धकाः नेपाल पुचलं थुइकूगु दु । थ्व ४४१ मध्ये ३०० म्ह केन्द्रीय दुजः थःपिंके दुगु व निर्वाचन आयोगयाके अन्तिमय् वनाः बहुमतं याःगु निर्णय स्वीकार यायेगु बाहेक मेगु विकल्प मदइगु दावी नं नेपाल पुचलं यानाच्वंगु दु ।

सम्बन्धित बुखँ

LEAVE YOUR COMMENTS