थनिंनिसें ३ नं. प्रदेशया प्रदेश सभा बैठक
नां व राजधानीया प्रस्ताव मदु
येँ – थनिंनिसें हेटौंडाय् न्ह्याइगु ३ नम्बर प्रदेशया अधिवेशनय् प्रदेशया नां व राजधानीयात कयाः छुं नं कथंया प्रस्ताव मवइगु खँ सीदुगु दु ।
थनिंनिसे न्ह्याइगु अधिवेशनय् थीथी विधेयक वइगु जूसां नं प्रदेश व राजधानीया बारे धाःसा छुं हे प्रस्ताव मवइगु खँ सभामुख सानुकुमार श्रेष्ठं ‘नेपालभाषा टाइम्स’ यात कनादिल । वय्कःया कथं राजधानी व प्रदेशया नां बारे छक्वलं प्रस्ताव वयेफइगु सम्भावना दुसां नं थुगु अधिवेशनय् धाःसा अज्याःगु छुं नं प्रस्ताव वइगु सम्भावना मदु ।
मेखे प्रदेशया सभासद् विशाल खड्कां धाःसा आः न्ह्याइगु अधिवेशनय् प्रदेश व राजधानी बारे सहलह यायेगु निंतिं थम्हं फक्व कुतः यानाच्वनागु खँ धयादीगु दु। वय्कलं आःया बैठक नियमित बैठक जूसां नं प्रदेशया नां व राजधानी क्वःछीमाः धासें प्रदेश सरकारं प्रतिबद्धता प्वंकेधुंकूगु विषययात थाति तयेगु उचित मजूगु दावी यासें धयादिल,
‘थ्व ला प्रदेश सरकारया बेइमानी व हेलचेक्राइ खः ।’
प्रदेशया नां व राजधानी क्वःछीगु निंतिं संविधानं हे स्पष्ट रुपं व्यवस्था याना तयेधुंकाः नं उकियात वेवास्ता यायेगु अधिकार प्रदेश सरकारयाके मदु धासें सरकारयात थप जिम्मेवार दयेकेगु निंतिं नं थम्हं प्रदेश व राजधानीया बारे बः बीगु खँ वय्कलं कनादिल ।
प्रदेश व राजधानीया बारे थ्व अलमल जुयाच्वंगुया मू कारण धाःसा राजनीतिक दलया नेतातय् दथुइ सहमति मजुयाः हे खः धाःगु दु। थ्व विषय तसकं जटिल जुजुं वनाच्वंगुलिं आः उच्चस्तरीय राजनीतिक सहमतिं हे जक थुकिया निर्णय याये फइगु जुयाच्वंगु दु तर अज्याःगु सहमति धाःसा नेतातय् दथुइ जुइ फयाच्वंगु मदुनि ।
प्रदेशया नां व राजधानीया विषय क्वःछीमाःगु थौंया आवश्यकता खःसां थुकियात इलय् क्वःछी मफुगुया दोष धाःसा प्रदेश सरकार प्रमुखयात वनाच्वंगु दु। प्रदेशया गुलिखे सांसदतय्सं थुकिया निर्णय प्रदेशसभां यायेमाः, पिनेयापिं नेतातय्सं बिया हइगु निर्देशन थःपिंत स्वीकार्य जुइ मखु धकाः दावी नं यानाच्वंगु दु ।
प्रदेशसभाया बैठकय् राष्ट्रिय वन कार्यविधि, प्रदेश सूचनाया हक सम्बन्धी विधेयक वयेत्यंगु दुसा यातायात व्यवस्था सम्बन्धी विधेयक संशोधन जुइगु खँ दु। यातायात नवीकरण इलय् मजूसा २०० प्रतिशत दस्तुर पुलेमाः धकाः न्हापा हःगु प्रस्ताव बारे यक्व विवाद वःगुलिं आः उकियात संशोधन यायेत्यंगु दु ।
LEAVE YOUR COMMENTS