शोभा भगवतिइ निःशुल्क भोजन

येँ – बोधिसत्व विहारया ग्वाहालि व सहिद गंगालाल प्रगति क्लबया संयोजनय् येँया शोभा भगवतिइ निःशुल्क भोजन याकेगु ज्या न्ह्याःगु दु । लकडाउनया इलय् आपालं मनूतय्त नयेगु समस्या जूगुलिं शनिवाः निसें नकेगु ज्या सुरु याःगु खः ।

नकेगु निंतिं विहारयापाखें ग्वाहालि वःगु खःसा मगाःगु तरकारी लगायत क्लबं तयाः निःशुल्क भोजन याकेगु व्यवस्था याःगु खः । चःमति ल्याम्ह पुचः व मिसा पुचःया नं ग्वाहालिइ सुथय् व बहनी यानाः न्हि द्वःछिम्ह मनूतय्त नकेगु योजन दुगु खँ क्लबं धाःगु दु ।

क्लबया दुजः कृष्णगोपाल रञ्जितकारं सुथय् ४ सय व बहनी ६ सय मनूतय्त नकेगु कथं तयारी जुयाच्वंगु जानकारी बियादिल । वय्कःया कथं विशेष यानाः गरिब, नयेत मगाःपिं, न्हिन्हि ज्या याना नयेमाःपिं व ज्यालादारी ज्या यानाः नयेमाःपिनि निंतिं थज्याःगु व्यवस्था यानागु कनादिल ।

मानवताया नातां नयेमखंपिं, आपांग, अशक्त मनूतय् निंतिं थज्याःगु व्यवस्था यानागु धयादिसें क्लबया अध्यक्ष देवरत्न डंगोलं आः थ्व लकडाउनया ई जःछि न्ह्यनाच्वनीगु जानकारी बियादिल ।