
येँ- नेपालभाषा ख्यःया सक्रिय कार्यकर्ता, भाषासेवी सुरेश शाक्य ‘लप्ते’ मंत । कोरोना संक्रमणया कारणं पाटन अस्पतालय् वासः याका च्वनादीम्ह वय्कः विहीवाः बहनि मुदुगु खः ।
थनिं नीनिन्हु न्ह्यः कोरोना संक्रमण जुइवं छेँय् च्वनाच्वंम्ह वय्कः स्वास्थ्यय् समस्या जुइवं करिब बाःछि न्ह्यः पाटन अस्पताल भर्ना जुयादीगु खः । छेँय् हे च्वँच्वनादीगु इलय् वय्कःयात सासः ल्हायेत समस्या जुइवं अक्सिजन बीमाःगु खःसा लिपा झन् समस्या जुइवं अस्पताल भर्ना याःगु खः ।
मदुम्ह वय्कःया अन्त्येष्ठि नेपाली सेनां याःगु खः । वय्कःया जहानलिसें काय छम्ह व म्ह्याय् छम्ह दी ।
मदुम्ह शाक्य नेपाल लिपि गुथिया संस्थापकमध्ये छम्ह खःसा वय्कः नेपालभाषाया एफएम न्यनामिपिनिगु संस्था नेपालभाषा एफएम न्यँमि गुथिया नं संस्थापक छ्याञ्जेलिसें थौंकन्हय्या नायः खः । अथे हे वय्कः पिपल्स क्याम्पसया नाय्खिं साहित्य पालाःया नं संस्थापक खः ।
छगू इलय् थीथी एफएमय् नेपालभाषा ज्याझ्वः निरन्तर रुपं न्ह्याकेगुलिइ नं वय्कलं आपालं ग्वाहालि यानादीगु खः । वय्कलं थीथी पत्रपत्रिकाय् च्वसु च्वयेगु नापं साहित्य ख्यलय् नं थःगु ल्हाः न्ह्याकादीगु दुसा छुं दिं न्ह्यः जक वय्कःया बाखं मुना सफू ‘किचलं दाःगु भाग्य’ पिहां वःगु खः ।
LEAVE YOUR COMMENTS