परिचय पत्रया गोपनीयताय् संकट
येँ – सरकारं वंगु छुं ई न्ह्यः नागरिकया सम्पूर्ण विवरण छगू हे कार्डय् दुथ्याइ कथं राष्ट्रिय परिचय पत्र जारी यात, तर उगु परिचय पत्र दुने दुथ्याःगु व्यक्तिगत सूचनाया गोपनीयता गय् यानाः कायम जुइ धइगु खँय् धाःसा न्ह्यसः पिहां वःगु दु । अज्याःगु राष्ट्रिय परिचय पत्रय् व्यक्तिया सम्पूर्ण जानकारी दुथ्यानाच्वंगु दइ । उकिं वयागु गोपनीयताया रक्षा जुइत थाकुइफु । थुकिया ग्यारेन्टी गय् यानाः जुइ धइगु न्ह्यसः पिहां वःगुलिं आः सरकारं थुकिया गोपनीयता रक्षा जुइगु कानून हे हयेगु तयारी याःगु दु ।
राष्ट्रिय परिचयपत्रय् समावेश जुयाच्वंगु व्यक्तिया विवरणया दुरुपयोग मजुइकेगु लागिं कानून हयेत सदनय् छगू विधेयक समेत दर्ता जुइधुंकूगु खँ सीदुगु दु । उगु विधेयकय् याना तःगु व्यवस्था कथं राष्ट्रिय परिचय पत्रय् दुथ्यानाच्वंगु जानकारीत सम्बन्धित व्यक्ति बाहेक उकियात जारी याःगु सम्बन्धित सरकारी ज्याकू व अदालतं जक प्राप्त याये फइ । व नं उमिसं थ्व जानकारी थःपिंत छाय् माःगु खः धइगु विवरण व कारण च्वयाः पौ छ्वया हल धाःसा जक सरकारं उकियात उपलब्ध याकी । व नं परिचय पत्रया सम्पूर्ण विवरण मबिसें उकिया दुने आवश्यक जूगु छगू ब्व जक छ्वयेगु ज्या जुइ । वयां अप्वः सार्वजनिक जुल धाःसा सार्वजनिक याःम्ह मनूयात कानुनी कारवाही जुइ फइगु व्यवस्था उकी यानातःगु दु ।
विधेयकय् याना तःगु व्यवस्था कथं राष्ट्रिय परिचयपत्रय् दुथ्याःगु सूचना सुनानं सार्वजनिक यात धाःसा वयात ५ निसें १० दँ तक कैद वा ५ निसें १० लाख तका जरिवाना वा नितां सजायँ जुइ फइ । सरकारं छुं ई न्ह्यः पाँचथरया छम्ह स्थानीयवासीयात राष्ट्रिय परिचय पत्र लःल्हासें देशय् थुकिया आरम्भ जूगु घोषणा याःगु खः । तर सम्पूर्ण रुपय् डिजिटाइज्ड जुयाच्वनीगु उगु परिचय पत्रया गोपनीयता गय् यानाः कायम
जुइ धइगु न्ह्यसः पिहां वयेवं परिचय पत्र वितरण ज्याझ्वःयात स्थगित याःगु खः । आः कानून दयेकेधुंकाः जक थुकियात हानं वितरण यायेगु खँ धाःगु दु ।
LEAVE YOUR COMMENTS