किपुली चितुवा : त्रिवि लँय् सनिलय् याकःबुक मजुइत आह्वान

किपू– किपूया त्रिवि लँय् सनिलय् –बहनी याकःबुकः मजुइत धाःगु दु । त्रिविया लँय् चितुवा खनेदुगुलिं किपू नगरपालिकाया मेयर रमेश महर्जनं थुगु लँय् याकःबुकः मजुइत आह्वान यानादीगु खः । थुकिया निंतिं किपू नगर दुने सुचं जारी यायेगु खँ नं वय्कलं धयादीगु दु ।

वंगु शनिवाः बहनी थुगु लँय् हे चितुवा वयाच्वंगु खनेदुगु खः । चितुवा खंकूम्ह छम्हेसिनं चितुवाया किपा कयाः सामाजिक सञ्जालय् तयाबिइवं आइतवाः मेयर महर्जन काठमाडौं वन कार्यालयय् खबर यानादीगु खः । वय्कःया खबर लिपा थौं सोमवाः अनुगमनय् वःम्ह सहायक वन अधिकृत हरि प्रसाद खरेल लिसे सहलह यायेधुंकाः थुगु लँय् बहनी याकःबुकः मजुइत आह्वान याःगु खः । थुकिया लिसें चितुवा सुलाच्वनीगु सम्भावना दुगु त्रिवि परिसरय् झाःपाः चिकेगु खँ नं मेयर महर्जनं धयादीगु खः ।

थौं अनुगमन यायेगु झ्वलय् सहायक वन अधिकृत खरेलं कानुनी रुपं चितुवायात स्याये मजिउगु व डार्ट यानाः ज्वनेगु कुतः यायेबलय् नं खतरा अप्वः दुगु धासें थुपिं चितुवायात थःथम्हं नं थःगु वासस्थानय् लिहां वनेगु वातावरण दयेकेमाःगु सुझाव बियादीगु खः । थुकिया निंतिं चितुवा सुलाच्वंगु सम्भावित थाय्या झाःपाः चिइकेमाःगु खँ वय्कलं धयादीगु खः । चितुवा लिहां मवंबलय् तकया निंतिं लँय् जुइगु सचेत जुयाच्वनेमाःगु सुझाव वय्कलं बियादीगु खः । थुकिया निंतिं नगरय् च्वंपिंत थुगु लँय् जुइबलय् होस याना जुइत सचेत यायेमाःगु खँ वय्कलं धयादीगु खः ।

त्रिविइ गार्ड च्वनीपिं सुरक्षा गार्डतय्सं ताःई न्ह्यव निसें थन चितुवा खनाच्वनागु खँ धाःगु दु । थुपिं चितुवातय्सं त्रिवि लागाय् वइपिं यक्व हे खिचा स्यानाः नयेधुंकूगु व गुबलें गुबलें साचा, द्वँहचा नं स्यानाः नःगु खँ धाःगु खः । सुरक्षा गार्डतय् कथं थुपिं चितुवा त्रिवि सेवा आयोग निसें फिजिक्स भवन, रजिष्ट्रार कार्यालय जःखः अप्वः खनेदु । सुरक्षा गार्डतय् कथं सनिलया ६–७ बजे निसें कन्हय् कुन्हु सुथय् ४–५ बजे तक थ्व चितुवात चाःहिला च्वनी, अले न्हिनय् जुल धायेवं सूवनीगु खँ धाःगु दु ।

सहायक वन अधिकृत खरेलं थुपिं चितुवात म्वाःपिं खिचाया ला नये पल्के थुइधुंकूपिं जूगुलिं सीम्ह जनावरया ला तयाः जालय् तक्यंकेत थाकुइगु खँ धयादीगु खः । वय्कलं उपिं सुलाच्वनीगु थाय् मंत धाःसा उपिं थःथम्हं तुं हे थःगु प्राकृतिक वासस्थानय् लिहां वनीगु खँ धयादीगु दु ।

‘थःपिं सुलेगु थाय् मंत धाःसा उपिं थःथम्हं तुं लिहां वनी । थ्व ई तक झीसं उमित छुं यायेमजिल । उमित हायेकेगु यात धाःसा उपिं नं हिंस्रक जुयाः मनूतय्त नं आक्रमण यायेफु । उकिं उमित महायेकुसें लिहां वनेगु वातावरण दयेकेगु हे आःया निंतिं उचित उपाय जुइ’ वय्कलं धयादीगु दु ।