‘लुँवह व्यवसायय् राज्यया दृष्टिकोण सकारात्मक मजू’
येँ – प्रधानमन्त्री केपी ओलीं लुँवह व्यवसायय् छुं समस्या दुसा सरकार कानुनी रुपं समस्या ज्यंकेत तयार दुगु खँ धयादीगु दु । नेपाल सुनचाँदी व्यवसायी महासंघया न्याक्वःगु साधारण सभाया झ्वलय् मू पाहाँया थासं न्ववानादिसें प्रधानमन्त्री ओली धयादीगु दु, ‘लुँवह व्यवसायया निंतिं माःगु कानुन, निर्देशिक दयेकेत सरकार तयार दु, उकिया निंतिं छु यायेमाः धयादिसँ ।’
थ्व झ्वलय् वय्कलं आवनिसें देशय् लुँ तस्करी जुइमखु धयादिसें कानुन दुने हे च्वनाः व्यवसाय यायेत नं लुँवह व्यवसायीतय्त इनाप यानादीगु खः । अथेहे वय्कलं सरकार व्यवसायीतय् सुरक्षाया निंतिं गम्भीर दु धयादिसें लुँवहया व्यवसायपाखें रोजगार अप्वयेकेगु निंतिं व्यवसायीतय्सं उत्पादन अप्वयेकेत बः बियादीगु खः ।
ज्याझ्वलय् लसकुस यानादिसें महासंघया अध्यक्ष मोहनकुमार सुनारं लुँवह व्यवसायया विकास व विस्तार लिसें मूल्य व मान्यता प्रति राज्यया दृष्टिकोण सकारात्मक जुइमाः धयादिल ।
५० अर्ब तकाया स्वयां अप्वः औपचारिक कारोवार जुइगु लुँवहया तिसा कारोवार आःतक नं ठोस नीति दयेकेमफुगु खँ न्ह्यथनादिसें वय्कलं धयादीगु दु, ‘सरकार व निजी ख्यःया तःगू चरणया वार्ता लिपा निर्देशिकाया खाका तयार जुइधुंकूसां आःतक घोषणा जुइमफुनि । इलय् हे निर्देशिका मबिसें सरकारी निकायपाखें हे व्यवसायीतय्त मनोबल गिरे यायेगु ज्या जुयाच्वंगु दु । थुकिया निंतिं प्रधानमन्त्रीया ध्यानकर्षण यानाच्वना ।’
न्याक्वःगु साधारण सभाया झ्वलय् महासंघं सुनचाँदी व्यवसाय ऐन पारित याकेगु निंतिं माःगु पहल याःगु निसें थ्व व्यवसायया विकासया निंतिं यायेगु ज्याया घोषणा पत्र नं जारी याःगु खः ।
वाणिज्य तथा आपूर्ति मन्त्री मातृकाप्रसाद यादव, अर्थमन्त्री युवराज खतिवडा, गभर्नर चिरन्जिवी नेपाल, नेपाल उद्योग वाणिज्य महासंघया अध्यक्ष भवानी राणा, येँ महानगरपालिकाया मेयर विद्यासुन्दर शाक्य, नेपाल चेम्बर अफ कमर्सया अध्यक्ष राजेशकाजी श्रेष्ठ, नेपाल हस्तकला महासंघया अध्यक्ष धर्मराज शाक्य, सुनचाँदी रत्न तथा आभूषण महासंघया अध्इष रमेश महर्जन, बैंकर्स संघया अध्यक्ष ज्ञानेन्द्रप्रसाद ढुंगाना, महासंघया विशिष्ट दुजः तेजरत्न शाक्य, पुलांम्ह नायः मणिरत्न शाक्यपिंत पाहाँ कथं ब्वनातःगु ज्याझ्वलय् वरिष्ठ उपाध्यक्ष व मूल समारोह समितिया संयोजक माणिकरत्न शाक्यं सुभाय् देछायादीगु खः । ज्याझ्वलय् थीथी व्यक्तिपिंत नायः मोहन सुनारं हनापौ नं लःल्हानादीगु खः ।
LEAVE YOUR COMMENTS