विष्णु नाति फोटो पत्रकारिता पुरस्कार लःल्हात

येँ(नेपालभाषा टाइम्स)- गोरखापत्र न्हिपौया फोटो पत्रकार विकास द्वारे ‘विष्णु नाती फोटो पत्रकारिता पुरस्कार–११४२’ पाखें सम्मानित जुयादीगु दु । विष्णु नाती फोटो पत्रकारिता सिरपाः गुथिया ग्वसालय् जूगु ज्याझ्वलय् न्हापांखुसी फोटो पत्रकार द्वारेयात उगु सिरपाः लःल्हाःगु खः ।

थन जूगु छगू ज्याझ्वलय् संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं फोटा पत्रकार द्वारेयात झिद्वः तका दांलिसें सम्मान पत्र लःल्हानादीगु खः । ज्याझ्वलय् नवासें मन्त्री श्रेष्ठं राई, लिम्बु, मगःतय्सं जक मखु खस् आर्यतय्सं नं झी नेवाःया संस्कृतियात च्वछायेगु यानाच्वंगु खँ कनादिल । लिसें वय्कलं ऐतिहासिककालनिसें नेपालमण्डल युरोपलिसे प्रतिस्पर्धा याये बह जूगुलिं तिब्बती व मुगल साम्राज्यपाखें नेपाःयात बचे याना तःथें आः वर्तमान साम्राज्यवादपाखें नं नेपाःयात बचे याना तयेमाःगु अवस्था वःगु दु धयादिल ।

नेवाः संस्कृतिया विश्वय् हे चर्चाया विषय जुइगुलिं नेवाः सम्पदा, संस्कृति, नखःचखः, जात्रा, पर्व, परम्परा आदिया प्रचार प्रसार यायेगु ज्याय् फोटो पत्रकारतय् तःधंगु भूमिका दइ धयादिल ।

नेपाल ललितकला प्रज्ञा प्रतिष्ठानया उपकुलपति गोपाल चित्रकारं तःदँ न्ह्यवनिसें नेवाः परम्परा व संस्कृतिइ एकचित्त जुयाः फोटो पत्रकारिता याना वयाच्वनादीम्ह महर्जनं थम्हं हे ध्यबा तयाः थ्व क्षेत्रय् वइपिं न्हू पुस्तायात सिरपाःया व्यवस्था याःगु च्वछायेबहगु ज्या खः धयादिल ।

सिरपाःया दाता वरिष्ठ फोटो पत्रकार नातीकाजी महर्जनं नेवाः परम्परा, संस्कृति, नखःचखः, रीतिथितिइ फोटो पत्रकारिता याइम्ह छम्ह फोटो पत्रकारयात दँय्दसं सम्मान यायेत सिरपाः नीस्वनागु जानकारी बियादिल ।

ज्याझ्वलय् नेवाः देय् दबूया नायः पवित्र वज्राचार्य, गुथिया सल्लाहकार पुष्करभक्त माथेमा, येँ महानगरपालिका १८ वडाअध्यक्ष न्हुछेकाजी महर्जनं नं नुगःखँ तयादीगु खः । सिरपाःया निंतिं उत्कृष्ट फोटो पत्रकार ल्ययेत वरिष्ठ फोटो पत्रकार शम्भु मानन्धरया संयोजकत्वय् स्वम्हेसिया छगू समिति गठन याःगु खः ।
गुथिया नायः दानदास श्रेष्ठया सभापतित्वय् जूगु ज्याझ्वलय् सचिव प्रविण महर्जनं लसकुस यानादीगु खः ।