खोना घोषणा जारी यासें नेवाः एकता दिवस

यल- न्यागू बुँदाया ‘खोना घोषणा’ जारी यासें झिंछक्वःगु नेवाः एकता दिवस क्वचाल । थुगुसी नेवाः एकता दिवस सरकारं दयेकेत्यंगु फास्ट ट्राय्कया कारणं वंगु छुं ई न्ह्यवंनिसें राष्ट्रिय चर्चाया विषय जुयाबच्वंगु खोना देशय् न्यायेकूगु खः ।

खोनाय् जूगु एकता दिवस ज्याझ्वः लिपा जारी याःगु खोना घोषणाय् नेवाः स्वायत्त राज्य प्राप्तिया लागिं जुयाच्वंगु आन्दोलनं दिपाः मकानिगु, नेवाः भूमिइ नेवाःतय्त विस्थापित यायेगु ज्याया विरुद्ध एकीकृत रुपं आन्दोलन न्ह्याका यंकेगु, नेवाःतय्त विभाजित यायेगु ल्याखं च्वय्या जात व क्वय्या जात धकाः दयेकाच्वंगु विभेदकारी प्रथायात न्हंका छ्वयेत मंकाः प्रतिवद्धता प्वंकेगु, नेवाः एकताया आधार जुयाच्वंगु नेपालभाषा, नेवाः संस्कृति व नेवाः सम्पदाया रक्षा यायेत अन्तर्राष्ट्रिय श्रम संगठन अभिसन्धि (आईएलओ १६९) नापं आदिवासी जनजातिया अधिकार सम्बन्धी संयुक्त राष्ट्र संघ घोषणापत्रयात कार्यान्वयन याना यंकेगु लागिं मेमेपिं आदिवासी जनजातिनापं नं जानाः मंकाः कथं न्ह्याः वनेगु खँ न्ह्यथनातःगु दु ।

व्यवस्थापन कजि नेपाल डंगोलं लसकुस यानाः न्ह्याकूगु एकता दिवसया उगु सभाय् नेवाः समाजया थीथी जातीय खलः पुचः नापं नेवाः आन्दोलनया थीथी मोर्चा व नेवाः स्वायत्त राज्य मंकाः संघर्ष समितिया थीथी घटकतय्सं मंकाः प्रतिवद्धता वाचन यानाः न्यंकूगु खः । ज्याझ्वलय् सांस्कृतिक ब्वज्या नं जूगु खः ।

सम्बन्धित बुखँ

LEAVE YOUR COMMENTS