मोहनियात हःम्ह खःम्येय् बिसिउँ वन

ख्वप(नेपालभाषा टाइम्स)- न्ह्यःने वयाच्वंगु मोहनिया लागिं थनया नवदुर्गा द्यःछँेय् लहीत हयातःम्ह खःम्येय् म्हीग बिसिउँ वन । खिपतं चिइत स्वयाच्वंगु इलय् उम्ह म्येय् द्यःछेँनं बिसिउँ वंगु दु ।

म्येय्यात ज्वनेत थीथी लँय् मनूत तैनाथ यानाः बाघौ तक कुतः यानाःलि बेखाल व महालक्ष्मी लागाया जःखः लागां हानं ज्वना हःगु खः ।

नवदुर्गाया लागिं न्यकू न्ह्यःने लिउने मस्वःम्ह, चक्र दुम्ह व तुतिइ छुं खुं मजूम्ह खःम्येय् माः धइगु मान्यता दु । थुगुसी ख्वप नगरपालिका वडा नं. १० य् च्वंम्ह पद्मकुमार गणेश श्रेष्ठं नवदुर्गायात थुम्ह खःम्येय् दान यानादीगु खः । थ्व म्येय्या मू छगू लाख, झिद्वः व न्यासः तकाः तूगु खँ धाःगु दु ।

गथांमुगः चःह्रे लिपाया आइतवाः वा बिहिवाः भिंदिं लाकाः नवदुर्गाय् उम्ह खःम्येय् दुत हयेगु चलन दु । प्यदँ न्ह्यवंनिसेंया थःगु इच्छा कथं झौखेलं न्यानाः उम्ह म्येय् दान याये खनाः थः तसकं लय्तायागु खँ पद्मकुमारं कनादीगु दु । थुगुसी म्येय् चीगु ज्या काजिलाल शाहीया काय् कान्छा शाहीं यानादिल ।

हनिया नवमिकुन्हु द्यःछँेनं जात्रा यानाः ब्रम्हायणी कुण्डय् लखं छ्वाकाःलि बहनी खःम्येय् स्याइगु चलन दु ।