रञ्जना लिपिं साईनबोर्ड तःपिंत हन

किपू (नेपालभाषा टाइम्स)- नेवाः देय् दबू किपू नगर समितिया निक्वःगु बुसा दँया लसताय् किपू नगर दुने रञ्जना लिपि छ्यलाः साइनबोर्ड तयातःगु सरकारी ज्याकू, संघसंस्था, खलः पुचः, पसःनिसें स्कूल, कलेज अले रञ्जना लिपि हे छ्यलाः छेँया नां तयातःपिं, रञ्जना लिपि छ्यलाः पत्रिका पिथनाच्वंगु व सार्वजनिक सवारी साधनय् रञ्जना लिपि छ्यलाच्वंपिं यानाः मुक्कं ८० गू संस्था व व्यक्तिपिंत हंगु दु ।

शनिवाः नेवाः देय् दबू किपू नगर समितिया नायः बुद्धिलाल ज्यापुया अध्यक्षताय् नेवाः देय् दबू स्वनिगः विशेष प्रदेशया नायः श्रीकृष्ण महर्जनया मूपाहांसुइ हनेज्या जूगु खः ।
किपू भाजंगाःया भैलःद्यःया देगःयात कालु पाण्डेया स्तूप धकाः गलत कथं प्रचार यानातःगु अवस्थाय् उगु गलत प्रचारयात खण्डन यायेगु सन्देश बिइत व हे भैलःद्यः दुगु थासय् मुना नेवाः ध्वाँय् ब्वयेकाः ¥याली यानाः भाजंगःया दिप दुगु विष्णुदेवी देगः लनगाय् थ्यंकाः समारोह जूगु खः ।

भाजंगाःया उगु दिप दुगु लागाया सांस्कृतिक भूमि संरक्षणया नितिं नेवाः समुदाय आन्दोलित जुयाच्वंगु अवस्थाय् थःपिनिगु नं एक्यबद्धता दु धकाः सन्देश बिइगु कथं अन हे नेवाः देय् दबूपाखें ज्याझ्वः याःगु खः ।

ज्याझ्वलय् मूपाहां नेवाः देय् दबू स्वनिगः विशेष प्रदेश समितिया नायः श्रीकृष्ण महर्जनं नेवाः देय् दबू किपू नगर समितिं सकल नेवाःतय्त सन्देश बीगु कथं ज्याझ्वः याना वयाच्वंगु दु धयादिसें विगतय् बागमती प्रदेशय् नेपालभाषायात सरकारी कामकाजि भाषाया रुपय् लागू याकेगु निंतिं सतकय् कुहां वःगु लिसें थीथी गतिविधि यानाच्वंगु च्वछाय्बहःजू धयादिल ।

अथे हे विशेष पाहां नेवाः देय् दबू स्वनिगः विशेष प्रदेशया सचिवालय् दुजः अधिवक्ता नरेश श्रेष्ठं नेवाःतसें सामुहिक अधिकारया नितिं न्ह्याः वनेमाःगु खँय् बः बियादल ।
अथे हे भाजंगाःया दिप व पीगं संरक्षणया नितिं जनस्तरं नीस्वंगु समितिया नायः श्रीकृष्ण महर्जनं लँ दयेकेगु नामय् संकत वइगु सम्भावना दुगु भाजंगाःया दिप व पीगं संरक्षणया नितिं माःगु कथं पहल यायेत न्ह्याः वनाच्वनागु खँ धयादिल ।

अथे हे पाहांपिं नेवाः देय् दबू येँ जिल्लाया छ्याञ्जे धनवीर महर्जन, ज्यापु महागुथि किपू नगर समितिया नायः रामभोला महर्जनपिंसं नेवाः देय् दबूया ज्याया बारे खँ कनादीगु खः ।

ज्याझ्वलय् सच्छिपुं मल्याक नेवाः म्येँ नापं नेवाः राष्ट्रिय म्यँेय् लय् तयादीम्ह तीर्थ मालीयात दोसल्लां न्ययेका नापं हनापौ लःल्हानाः हनेज्या याःगु खः ।अथेहे ज्यापु महागुथिया पुलांम्ह केन्द्रीय नायः नापं लोककवि राजभाई जकःमि, कविपिं अर्जुन नेपाःमि व कुलबहादुर महर्जनं चिनाखँ न्यंकादीगु खः ।

किपुलिइ नेवाः भाषा, संस्कृति, लिपि नापं थीथी विषययात कया ज्याझ्वः याना वनेगु नितिं नेवाः देय् दबू किपू नगर समितिया ब्यागलं कथं कोष दयेका वनेगु धकाः घोषणा याःगु खःसा उगु कोषया निंतिं शनिवाः हे छगू लख व स्वीद्वःसिबें अप्वः ध्यबा मुंकेगु ज्या नं जूगु खः ।