सम्भावित महामारी पनेत अन्यौलता

येँ- देशय् संघीयता कार्यान्वयनलिसें थीथी सरकारी ज्याकू खारेज यायेगु निर्णयं सम्भावित महामारी पनेगु खँय् अन्यौलता ब्वलंगु दु ।
संघीयता लागू जुयाः कार्यान्वयनय् वये धुंकाः जिल्ला जनस्वास्थ्य ज्याकू खारेज यायेगु निर्णय लिपा सम्भावित महामारी पनेत सुनां तयारी यायेगु धइगु खँय् स्थानीय तह व जनस्वास्थ्य ज्याकू दथुइ अन्यौलता ब्वलंगु खः ।

स्वास्थ्य तथा जनसंख्या मन्त्रालयं दक्वं जिल्लाय् च्वंगु जनस्वास्थ्य ज्याकूयात तयारी यायेत निर्देशन बिउगु दुसा थुगुसी स्वास्थ्य सम्बन्धी दक्वं बजेट स्थानीय तहय् वंगु दु ।

थुगुसी धाःसा स्थानीय तह व प्रदेशयात हे दक्वं अधिकार बिउगु व जिल्ला जनस्वास्थ्य ज्याकू थ्व हे असारंनिसें खारेज यायेगु निर्णयया कारणं सम्भावित महामारी पनेत यायेमाःगु पूर्व तयारी प्रभावित जूवंगु खः ।

स्वास्थ्य सेवा विभागया उप महानिर्देशक चुडामणि भण्डारीं जनस्वास्थ्य ज्याकू खारेज जुइगु जुल धकाः महामारी पनेगु निंतिं यायेमाःगु पूर्वतयारी दिके मिले मजू धयादिल ।