खुल्ला सतकय् च्वंपिं बेसहारा व असहाय प्यम्हेसिया उद्धार

येँ – मानवसेवा आश्रमं चिकुलाया इलय् येँया खुल्ला सतकय् जीवन हनेत बाध्य जुयाच्वंपिं बेसहारा व असहाय प्यम्हेसित उद्धार याःगु दु । आश्रमं थीथी थासय् उकथं जीवन हनेत बाध्य जुयाच्वंपिनिगु बारे अध्ययन यायेगु झ्वलय् खुल्ला सतकय् चा छ्यानाच्वंपिं प्यम्हेसित उद्धार याःगु खः ।

आश्रमं येँया ल्हुति, बसन्तपू, न्यत, छत्रपाति, सो¥हखुट्टे, कालिमाति, डल्लु, ग्वंगःबुँ, माछापोखरी, स्वयम्भू, मांकाःद्यः, रत्नपार्क, जमः आदि थासय् स्थलगत अध्ययन लिपा प्यम्हेसित बहनि हे उद्धार यानागु आश्रमया प्रदेश नं. ३ या संयोजक सुमन बर्तौलां जानकारी बियादीगु दु ।

येँ महानगरपालिकालिसे समन्वय यानाः येँया खुल्ला सतकय् जीवन हनेत बाध्य जुयाच्वंपिंत उद्धार यायेगु झ्वलय् आश्रमं न्यतपाखें टलकबहादुर मगर, कालिमातिं ३० दँ दुम्ह तर पहिचान खुले मजूम्ह छम्ह ल्याय्म्ह, व पशुपतिं निम्ह पहिचान खुले मजूपिंत उद्धार याःगु खः ।

आश्रमं उकथं सतकय् चा छ्यायेत बाध्य जुयाच्वंपिनिगु बारे अध्ययन यायेगु झ्वलय् भारी कुबीपिं, प्लाष्टिक मुनीपिं, श्रम याइपिं व फ्वनीपिं अप्वः दुगु खँ सीदुगु दु । पशुपति विकास कोषं नं आश्रमलिसे सहकार्य यानाः पशुपति लागाय् अज्याःपिं व्यक्तिरहित क्षेत्र नं घोषणा याःगु खः । छगू इलय् स्वसः स्वयां अप्वः सहयोगापेक्षी दुगु थासय् आः छम्ह नं अज्याःपिं मदयेधुंकूगु दु ।