त्याइगु आश अझं दनि – सिंह

येँ – नेपाली कांग्रेसपाखे येँ महानगरपालिकाय् मेयरय् उम्मेदवारी बियादीम्ह सिर्जना सिंहं थः त्याइगु आश अझ नं दनीगु खँ धयादीगु दु । मतगणना जुयाच्वंगु राष्ट्रिय सभागृहय् सञ्चारकःमित लिसे खँ ल्हायेगु झ्वलय् मय्जु सिंह उगु खँ धयादीगु खः ।

वय्कलं महानगरया आपालं मत अझ नं ल्याः खायेगु ज्या ल्यं दनिगुलिं त्याइगु आश दुगु खँ धयादीगु खः । वय्कलं धयादिल, ‘नकतिनि ६० हजार जक मत ल्याःखायेगु ज्या जूगु दु । आः हे त्याः–बूया निर्णय जुइफइमखु, जिमिसं त्याइगु वडाय् मत व हे मवःगु नं मखु ।’

सिंह थःपिंसं अपेक्षा यानाकथं मत मवःगु खःसां नं थ्व विषयय् फुक्कं मतगणना जुइधुंकाः जक प्रतिक्रिया बीगु खँ धासें धयादिल, ‘थ्व स्वयां बांलाःगु जुइमाःगु खः, गुगुं थासय् बांलाक मत वयाच्वंगु दुसा गनं बामलाक मत वयाच्वंगु दु, तर अप्वः मत ल्याःखाये ल्यं दनि, आः हे निष्कर्षय् थ्यंकेगु पाय्छि मजू ।’

देय्न्यंक न्हापांगु थासय् लानाच्वंगु कांग्रेस येँ लिउने लाःगु खँय् थः अजू चायागु खँ धासें वय्कलं धयादिल, ‘जितः वःगु छगू भोटयात नं जिं सम्मान यानाच्वना, प्रत्येक वडाय् जिगु मत बांलाक वःगु दु, आः ल्यं दनिगु वडाय् नं जितः माया यानाः मत बिउगु आश जिं याना, जि त्याइगुलिं पूर्ण आशावादी दु ।’ वय्कलं आः तक वःगु मतयात थःम्हं सहज रुपं कयाःगु खँ नं धयादीगु दु ।

थाैं सनिलय् तकया मत परिणाम कथं मेयरय् स्वतन्त्र उम्मेदवार बालेन साह २२ हजार ८४२ मत हयाः न्ह्यःने लानाच्वंगु खःसा ११ हजार ७६९ मत हया एमालेया केशव स्थापित निगूगु थासय् लानाच्वंगु खः । उकथं हे सिंह १० हजार ९८६ मत हयाः स्वंगूगु थासय् लानाच्वंगु खः ।

मेखे नेकपा एमालेया उपमहासचिव प्रदिप ज्ञवालीं स्थानीय तह निर्वाचनय् पार्टीया जनमत यथावत दुगु दाबी यानादीगु दु । म्हिगः प्रतिनिधिसभा बैठकया निंतिं संसद भवन थ्यंम्ह ज्ञवालीं सञ्चारकःमितय्त प्रतिक्रिया बिसें उगु खँ धयादीगु खः ।

वय्कलं मेगु पार्टी लिसे म्हो मत अन्तर दुगु थासय् गठबन्धनया कारणं थःपिं बूगु धासें २०४८ साल निसें वयाच्वंगु जनमत थुगुसीया निर्वाचनय् च्वय् क्वय् मजूगु खँ धयादीगु दु ।

पत्रकारपिं लिसे खँ ल्हायेगु झ्वलय् उपमहासचिव ज्ञवालीं धयादिल, ‘जिमिसं देय्न्यंकंया तथ्यांक संकलन यानाच्वनागु दु, जिमिगु समग्र जनमत यथावत दु, तर आः न्यासः द्वःछि प्रतिस्पर्धाय् दुगु थासय् छगू मेगु पार्टी थप जुइवं उकिं लिच्वः लाकीगु जुल, जिमिगु गुगु औसत जनमत खः, लोकप्रिय मत २०४८ सालं निसें च्वय् क्वय् लाःगु मदुनि ।’

सम्बन्धित बुखँ

LEAVE YOUR COMMENTS