
येँ – निर्वाचन आयोगं मतदान क्वचाःगुयां खुन्हुया दुने मतगणना सिधयेकेगु कथं तयारी याःगु दु । जेठ ५ गते देय्न्यंकंया स्थानीय तहया जनप्रतिनिधिया पदावधि क्वचाइगु जूगुलिं आयोगं व स्वयां न्ह्यःहे मतगणना क्वचायेकाः लिच्वः सार्वजनिक यायेगु तयारी यानाच्वंगु खः ।
उकिया लागिं आयोगं अप्वः जनशक्ति छ्यलेगु व उकी गनं नं पंगः पिमकायेत मुख्य निर्वाचन अधिकृतय्त नं निर्देशन बीधुंकूगु दु ।
आयोगया कथं मतगणनाय् महानगरपालिका व उपमहानगरपालिकाय् छुं भचा समस्या वये फइगु जूगुलिं अन अप्वः जनशक्ति छ्यलाः जूसां ज्या याकेगु तयारी यानाच्वंगु दु ।
२०७४ सालय् वैशाख ३१ गते स्थानीय तहया निर्वाचन जूगु खः । स्थानीय तहलय् निर्वाचन जूगुयां खुन्हु लिपा न्हू निर्वाचित जुया वःपिं प्रतिनिधितय् पदावधि शुरु जुइगु तायेकीगु व्यवस्था दुगुलिं देय्न्यंकंया स्थानीय तहलय् जेठ ६ गतेनिसें न्हूपिं पदाधिकारीपिनि पद बहाली शुरु जुइ । थुकथं स्वयेबलय् २०७९ जेठ ५ गते वर्तमान जनप्रतिनिधितय् कार्यकाल पूवनी । निर्वाचन आयोगं पुलांपिं जनप्रतिनिधिपिं विदा जुइ स्वयां न्ह्यः हे न्हूपिं जनप्रतिनिधिपिं निर्वाचित जुयाः पदबहाली यायेगु व्यवथा मिले यायेगु लागिं याकनं मतगणना क्वचायेकेगु तयारी यानाच्वंगु खः ।
महानगरपालिका व उपमहानगर पालिकाय् अप्वः जनसंख्या दुगुलिं दकलय् न्हापां अनया मतगणना क्वचायेकेगु योजना नं आयोगं दयेकाच्वंगु दु । वंगु स्थानीय चुनावय् मतगणना सुस्त जूगु द्वपं आयोगयात लाःगु खः । थुगुसी अज्याःगु द्वपं मवयेमा धकाः आयोगं याकनं मतगणना क्वचायेकेगु तयारी यानाच्वंगु खः ।
LEAVE YOUR COMMENTS