नागरिकतय् अधिकार सुनिश्चित यायेत जिगु उम्मेदवारी खः – सुमन सायमि
सतक विस्तार अभियानं चुनावी मैदानय् कुहां झायादिल, छाय् खः ?
मुख्यतः नागरिकतय् अधिकारयात सुनिश्चित यायेत व सुशासनया प्रत्याभुति बीत जि येँ महानगरपालिकाया मेयरय् उम्मेदवारी बियागु खः । राज्यं गैरन्यायिक सतक विस्तार यानाः नागरिकतय्त संविधानं बियातःगु भूमि, सम्पत्तिया अधिकार तकं हनन यानाबिल । हरेक नागरिकयात उचित आवासया व्यवस्था जुइ धाधां नं सतक विस्तार याःबलय् विना क्षतिपूर्ति, विना मुआब्जा छेँ थुनाः भूमिहिन दयेकाबिउगु दु । सर्वोच्च अदालतं अनाधिकृत रुपं कब्जा यायेमेत, विना सहमति छेँ थुनेमत धकाः परमादेश बिलं नं राज्यं गुण्डागर्दी शैलीं सर्वोच्च अदालतया आदेश तकं माने मयासे नागरिकतय्त उठीबास याःगु दु । थुकिया विरुद्ध जिगु उम्मेदवारी खः ।
प्रचार प्रसार गुकथं न्ह्यानाच्वंगु दु ?
जिमिसं ५०१ म्हेसिया प्रचार प्रसार समिति दयेकातःगु दु । मूल धारया धाःगु मिडियातय्सं विभेद याःसां नं जिपिं गुथि आन्दोलनया नेतृत्वकर्ता जूगु कारणं नं आन्तरिक रुपं यक्व ज्या यानागु दु । जिपिं न्हापां निसें हे समाजय् म्हसीका दुपिं खः । उकिं जिमिसं रणनीतिक रुपं प्रचारप्रसार यानाच्वनागु दु । जिपिं विजयया सतिक दु ।
छिगु मू एजेन्डा छु खः ?
जिमिगु मू एजेन्डा धयागु येँ मनपाया सांस्कृतिक भूमि, संस्कृति, सम्पदा, भाषाया संरक्षण यायेगु, शिक्षा व स्वास्थ्य निःशुल्क व समान यायेगु, भ्रष्टाचारयात निर्मूल यायेगु, वातावरणयात प्रदूषण मुक्त यायेगु, बसाइ सराइयात व्यवस्थित यायेगु, सहअस्तित्वया सम्मान यायेगु, आत्मनिर्भरतायात अप्वयेकेगु, विज्ञान व प्रविधिया गुलि फु उलि छ्यलाः खुसि बांलाकेगु, धू नियन्त्रण यायेगु, सार्वजनिक जग्गाया संरक्षण यानाः पार्क, बाल उद्यान आदि दयेकेगु, स्वच्छ त्वनेगु लःया व्यवस्था यायेगु, खोज व अनुसन्धान यानाः विकासया परियोजना दयेकेगु, प्रविधि मैत्री प्रशासन दयेकेगु खः ।
नेवाःतय्सं छिगु उम्मेदवारीयात गुकथं कयाच्वंगु दु ?
जिमिगु उम्मेदवारी समुदायपाखें अनुमोदित खः ।
निगू तःधंगु दलया दथुइ सम्भावना छु दु ?
आःया दलतपाखें नागरिकत वाक्क दिक्क जूगु दु । मतदातातय्सं स्वतन्त्रपाखें सक्षम नेतृत्व ल्ययाच्वंगु दु । उकिं समुदायपाखें अनुमोदित उम्मेदवार ज ूगुलिं जिपिं त्याइगु पक्का दु ।
त्यात धाःसा छिं नेतृत्व यानाच्वंगु आन्दोलन छु जुइ ?
– जिगु विजय धयागु हे आः जुयाच्वंगु आन्दोलनया मुद्दात स्थापित जूगु खः । विजय नं आन्दोलनया हे छगू ब्व खः ।
मतदातातय्त छु धयादी ?
दशकौं न्ह्यवनिसें नागरिक अधिकार, सुशासन, समानता व राष्ट्रिय स्वाधिनताया निंतिं ल्वानाच्वनागु जिमिगु टिमयात तिकिझ्याः चुनाव चिंनय् मतदान यानाः स्वतन्त्र, स्वच्छ व सक्षम उम्मेदवारतय्त अत्यधिक मतं त्याकेत इनाप याना ।
LEAVE YOUR COMMENTS