स्थापित व डंगोल येँया श्रमिक

येँ – म्हिगः मे दिवसया लसताय् देय्या थीथी थासय् थीथी मजदूर संगठनतय्सं ज्याझ्वःत यात । स्थानीय चुनाव न्ह्यः जूगु मे दिवसयात नं राजनीतिक पार्टीतय्सं धाःसा चुनावी सभाया रुपय् हे प्रयोग याःगु खनेदत ।

थ्व लसताय् नेकपा (एमाले) समर्थित मजदूर संगठन जिफन्टं याःगु ज्याझ्वलय् मूपाहां कथं पार्टी अध्यक्ष केपी ओलीं ब्वति कयादीगु खः । ज्याझ्वलय् न्ववायेगु झ्वलय् वय्कलं नेवाः समाजया स्थापित व डंगोल धइपिं येँ देय्या पुस्तौनी श्रमिक हे खः धासें वहे जुयाः थुगुसी एमालें केशव स्थापित व सुनिता डंगोलया टीमयात येँया स्थानीय चुनावय् थनागु खः धयादिल । स्थापित विकासया मोडल थूम्ह व डंगोल येँ देय्–यात बांलाक म्हसिउम्ह उम्मेदवार खः धासें वय्कःपिनि विजय सुनिश्चित जुइधुंकूगु दावी नं यानादिल ।

ज्याझ्वलय् एमालेपाखें उपमेयरया उम्मेदवार जुयादीम्ह सुनिता डंगोलं थःगु भाषणयात सांकेतिक भासं समेत थम्हं हे अनुवाद यानाः प्रस्तुत यासें स्वकुमितय् नुगः त्याकादीगु खः ।

ज्याझ्वलय् मेयर पदया उम्मेदवार केशव स्थापित लिसें आपालं नेता कार्यकर्तातय् नं उपस्थिति दुगु खः ।

सम्बन्धित बुखँ

LEAVE YOUR COMMENTS