चीहा संकिपा कासाय् ‘हाःसः मदुगु सः’

येँ – नेपालभाषा चीहा संकिपा कासा–११३८ य् ‘हाःसः मदुगु सः’ न्हाप लाःगु दु । संकिपाकःमि सुनिता राजभण्डारी जुनुया निर्देशनय् दयेकूगु थ्व शर्ट फिल्मं ७५ द्वः तका दां सिरपाः त्याकूगु खः । अथेहे दर्शनवीर शाक्यं दयेकूगु ‘द मिथ–०’ लिउ लाःगु दुसा संकिपाकःमि रामकृष्ण खड्गीं दयेकूगु ‘अस्तित्व’ व यादवदास भोछिभोयां दयेकूगु ‘भकुंग्वारा ख्याः’ लियां लिउ सिरपाः त्याकूगु दु ।

लिउयात ५० द्वः तका व लियांलिउ लाःगु निगूयात २५–२५ द्वः तका दां सिरपाः नं लाःगु दु । येँया विश्वज्योति हलय् बिहिवाः कासाय् दुथ्याःगु झिगुलिं शर्ट फिल्मया क्यनेज्या लिपा नेवाः न्ह्यलुवा व मानवअधिकारवादी नेता पद्मरत्न तुलाधरं सिरपाः लःल्हानादीगु खः ।

थ्वहे ज्याझ्वलय् चीहा संकिपा कासा ग्वसाः पुचःपाखें आकिवं निक्वःगु चीहाः संकिपा धेंधेंबल्लाः नं यायेगु घोषणा याःगु खः । वइगु च्याला दुने (ने.सं. ११३९ तछलाथ्व पारु) थःथः संकिपा दयेकेया लागिं नं ग्वसाः पुचलं इनाप याःगु दु । थुकिया लागिं थिम कथं नेपालभाषां प्रकाशित छुं नं साहित्यिक कृतिइ आधारित संकिपा जुइमाःगु खँ नं ग्वसाः पुचलं धाःगु दु ।