ने. सं. ११४६ चाैलागा त्रयोदशी - थिमि बालकुमारी जात्रा

प्रदेश १ या नां ‘किरात’ तयेत प्रदर्शन व ज्ञापन

येँ (नेपालभाषा टाइम्स)÷देय्या न्हय्गू प्रदेश मध्ये खुगू प्रदेशं थःगु नां क्वःछीधुंकाः नं प्रदेश नम्बर १ या नां क्वःछीगु ज्या धाःसा आः तक जुइ मफुनि । प्रदेश सभाया न्हापांगु कार्यकाल क्वचाइगु ई त्ययेधुंकाः नं प्रदेशया नां तयेगु सम्बन्धय् राजनीतिक पार्टीतय् दथुइ सहमति कायम जुइमफयेवं प्रदेशया नां क्वःछीत समस्या जुयाच्वंगु खः ।

थ्वहे झ्वलय् प्रदेशया नां तयेगु नितिं दबाब बीकथं म्हिगः प्रदर्शन जूगु दु । म्हिगः किरात राई यायोक्खां प्रदेशया नां ‘किरात प्रदेश’ तयेमाःगु माग यासें मुख्यमन्त्री ज्याकू न्ह्यःने घेराउ याःगु दु ।

म्हिगःया घेराउ ज्याझ्वलय् १४ जिल्लाया मनूत भेला जूगु खँ ग्वसाः खलकं जानकारी बिउगु दु । घेराउ याःपिंसं पहिचानया आधारय् प्रदेश १ या नां किरात जुइमाः धासें नारा थ्वयेकूगु खःसा मुख्यमन्त्री राजेन्द्र राईयात ज्ञापन पौ नं लःल्हाःगु खः ।

ज्ञापन पौ लः ल्हायेगु झ्वलय् किरात राई यायोक्खाया अध्यक्ष दिवस राईं प्रदेशया नां ‘किरात’ घोषणा याकेत सफल जुल धाःसा मुख्मन्त्री राईयात थःगु इतिहास पूर्खा धकाः म्हसिउम्ह यलम्बरया उपाधीं सम्मान यायेगु घोषणा नं यानादीगु खः ।

लिसलय् मुख्यमन्त्री राईं किरात प्रदेशया नां तयेगु खँय् थःगु नं समर्थन दुगु धासें थम्ह सार्वजनिक रुपं किरात प्रदेश जुइमाःगु माग याना वयाच्वनागु खँ धासें धयादिल, ‘जिं धया वयाच्वनागु दु, पहिचानया आधारय् प्रदेशया नां तयेमाः, जिं खुल्ला रुपं धया वयाच्वनागु दु, प्रदेशया नां पहिचानया आधारय् किरात प्रदेश जुइमाः, प्रदेशया नां तयेगु नितिं मतदान यायेबलय् जिं न्ह्याथे यानाः जूसां किरात प्रदेशय् यायेगु जुइ, किरातया काय्मचा जूगु नातां जिं थथे धयागु मखु, प्रदेश १ या पहिचान व सभ्यता लिसे स्वानाच्वंगु प्रदेश खः, अथे जुयाः नं प्रदेशया नां किरात प्रदेश जुइमाःगु दसि दुगुलिं किरातया पक्षय् न्ववाना वयाच्वनागु दु ।’

मुख्यमन्त्री राई माओवटादीं जनयुद्धया इलंनिसें पहिचानया आधारय् नां तयेमाःगु एजेण्डा ज्वनाच्वनागु धासें धयादिल, ‘माओवादीं ला अभ्यास हे याःगु खः, चुनावया इलय् नं याःगु खः, एमालें नं चुनावय् जनताया थाय् वनेगु झ्वलय् बहुपहिचानया आधारय् नां तयेगु खँ ल्हाःगु खः, पार्टीया महाधिवेशन व दस्तावेजनय् नं एकीकृत समाजवादीं नं पहिचानया आधारय् नां तयेमाःगु खँ धयातःगु दु, अथे जुयाः लिमबाकुसें पहिचानया आधारय् प्रदेशया नां तयेमाः, जनतायात आश्वासन जक बियाः पहिचानया आधाय् बिसिउँ वनेमजिउ ।’