ने. सं. ११४४ ञलाथ्व दशमी -

‘स्थानीय कर्मचारी क्वालिफाइड मदु’

यल – स्थानीय निकायया कर्मचारीतय्सं स्थानीय निकाययात ग्वाहालि मयाःगु द्वपं यल महानगरपालिकाया मेयर चिरीबाबु महर्जनं बियादीगु दु ।
वय्कलं थःगु स्पिड कथं स्थानीय निकायया कर्मचारीत न्ह्याःवने मफुगु खँ कनादिसें आः न्हापाया स्वयां नं छुं भचा ज्या यायेत अःपुगु खँ ‘नेपालभाषा टाइम्स’ लिसें खँ ल्हायेगु झ्वलय् कनादीगु दु । झिंच्यादँ तक स्वच्छेचारी कथं ज्या यानाच्वंपिं कर्मचारीतय्त आः निर्वाचित जनप्रतिनिधित स्वीकार यायेत थाकुयाच्वंगु खँ कनादिसें वय्कलं न्हापाया कर्मचारीत बुरा नं जुइधुंकूगुलिं नं ज्याय् स्पिड मदुगु जुइफु धयादिल । ‘आः दुपिं सरकारी कर्मचारी क्वालिफाइड मदु, झीगु स्पिडय् वयेत उमित तसकं थाकु’ वय्कलं कनादिल । पुलांपिं कर्मचारीतय्के पुलांगु ह्याङओभर ल्यनाच्वंगु धासें उगु ह्याङ ओभर रिमुभ यायेगु ज्या जुयाच्वंगु खँ नं वय्कलं कनादिल ।

आः दुपिं कर्मचारीयाके ट्रेनिङ नं मदु धासें उमित ट्रेन यायेगुया निंतिं थम्हं कुतः यानाच्वनागु जानकारी नं वय्कलं बियादीगु दु । स्थानीय निकायया कर्मचारीतय्सं स्थानीय जनप्रतिनिधितय्त टेरे मयाइगु समस्या थौंकन्हय् देय्न्यंकंया हे स्थानीय निकायय् ब्वलनाच्वंगु दु । स्थानीय निकायय् आः नेपाल सरकारया कर्मचारीत नं ल्वाकज्याः वःगुलिं निथ्वःसिया दथुइ द्वन्द्व समेत जुयाच्वंगु नं खनेदु ।

प्रदेश कर्मचारीया थःगु हे समस्या
थीथी प्रदेशय् सरकारं खटे याःपिं कर्मचारीत मवन धकाः तःधंक आलोचना जुयाच्वंगु दु । तर खटे जुयाः अन वंपिं कर्मचारीत नं च्वनेगु थाय् तकं मदयाः अलपत्रय् लानाच्वंगु खँ धाःगु दु । खास यानाः ६ व ७ नम्बर प्रदेशय् खटे जुयाः वंपिं कर्मचारीत बालं च्वनेगु क्वथा तकं मदयाः होटलय् च्वने मालाच्वंगु दु । तर होटलय् पुले फइगु थःपिनि तलब मदुगु जुयाः मेपिं वनेत तकं ग्यानाच्वंगु खँ पीडित कर्मचारीतय्सं धाःगु दु ।