टि–२० ग्लोबल छनोटया धलः सार्वजनिक नेपाःया न्हापांगु कासा ओमानलिसें

येँ – आइसिसीं विश्वकप टि–२० ग्लोबल छनोटया धल शुक्रवाः सार्वजनिक याःगु दु । आइसिसीं निगू पुचलय् च्यागू टिमयात विभाजन यानातःगु दु । समुह ‘ए’ य् प्यंगू टिम व समुह ‘बी’ इ प्यंगू टिम दु । समुह ‘ए’य् बहराइन, जर्मनी, आयरल्याण्ड व युएइ दुसा समुह ‘बी’ इ नेपाः, ओमान, क्यानाडा व फिलिपिन्स दु । फाइनलय् थ्यनीगु निगू टिमं अक्टोबरय् जुइगु टि–२० विश्वकपय् थाय् दयेकी ।

नेपालं न्हापांगु कासा फेबुअरी १८य् ओमनलिसे, फेब्रुअरी १९ य् फिलिपिन्सलिसे व फेब्रुअरी २१ य् क्यानाडालिसे म्हिती । समुह विजेता व उपविजेतां सेमिफाइनलय् थाय् दयेकीसा फाइनलय् थाय् दयेकेत समूह ए या विजेतां बीया उपविजेतालिसे व बीया बिजेतां एया उपविजता लिसे धेंधेंबल्लाः याइ । सेमिफाइनल कासा २२ फेब्रुअरीइ जुइ । अथे हे फाइनल २४ फेब्रुअरी जुइ ।

नेपालं छनोट कासा म्हिते न्ह्यः प्यंगू देशीय टि–२० सिरिज म्हितीगु ज्याझ्वः दु । नेपालं युएइ, आयरल्याण्ड व ग्वसाः देय् ओमानलिसे म्हितीगु जुइ । नेपालं सन्दीप लामिछानेया कप्तानीइ छनोट कासाय् ब्वति कायेत्यंगु खः ।