ने. सं. ११४४ चौलाथ्व दशमी -

थाय्मदुया म्हसीका ‘थाय्मदु त्वाः छपुलु’

येँ- येँ महानगरपालिका वडा नं. २५ थाय्मदु त्वालय् च्वंगु त्वाःछेँ समितिया ग्वसालय् न्हापांगु थाय्मदु त्वाः मुना ज्याझ्वः जुल । त्वालय् च्वंपिं व त्वाः त्वःता वनाच्वंपिं दथुइ म्हसीका कालबिल यायेगु ल्याखं जूगु ज्याझ्वलय् साहित्यकार, च्वमि लिसें नेवाः न्ह्यलुवा मल्ल के. सुन्दरं च्वयादीगु ‘थाय्मदु त्वाः छपुलु’ सफू नं पितब्वज्या याःगु खः ।

समितिया नायः प्रा. डा. रमेश श्रेष्ठया सभापतित्वय् जूगु ज्याझ्वलय् येँ महानगरपालिका प्रमुख विद्यासुन्दर शाक्य मूपाहांकथं झायादीगु खः। ज्याझ्वलय् नवासें मूपाहां येँ महानगर प्रमुख शाक्यं त्वालय् हे च्वंगु मंकाः खलःया आन्दोलनय् ब्वति काकां उगु इलय् पद्मरत्न तुलाधर, मल्ल के. सुन्दरया भाषण न्यँन्यं हे थः नं भाषा ख्यलय् आकर्षित जूगु खँ कनादिल ।

येँ महानगरपाखें सम्पदा संरक्षणया निंतिं गुकथं आर्थिक अनुदान बियाः ज्या न्ह्याकाच्वंगु खः, उकी त्वाःछे समितिया छेँ नं मौलिक नेवाः पहलं दनेगु निंतिं कुतः यायेगु प्रतिवद्धता प्वंकादिल ।

सफूया च्वमि मल्ल के. सुन्दरं येँ महानगर प्रमुख शाक्यया सक्रियताय् महानगर दुनेया आपालं सम्पदा संरक्षण यायेगु ज्या तसकं च्वछायेबहजू धासें त्वाःछेँ समितिया छेँया स्वामित्वयात कयाः महानगरलिसे जुयाच्वंगु विवाद याकनं निरुपण यानाः त्वाःछेँ दना बीत इनाप यानादिल ।

पितब्वज्या जूगु सफूयात कयाः प्रा. नर्मदेश्वर प्रधान व साहित्यकार शरद कसां समीक्षात्मक टिप्पणी यानादीगु खः । जनगायक भृगुराम श्रेष्ठ व लोकंह्वाःम्ह म्येँ हालामि पवित्र कसां म्येँ न्यंकादीगु ज्याझ्वलय् समितिया दांभरिं रिजेन्द्र राजभण्डारीं लसकुस यानादीगु खःसा न्वकु राजेशप्रसाद श्रेष्ठं सुभाय् देछानादीगु खः ।