ने. सं. ११४४ कौलाथ्व पारू - नःलास्वनेगु

येँ महानगरया नमूना विद्यालयय् सम्पदा, कला, संस्कृति संरक्षण व सहरी कृषि ब्वंकीगु

येँ महानगरपालिकां नमुना ब्वनेकुथि संचालनया निंतिं विनियमावली तयारीया ज्या न्ह्याकाच्वंग दु । थज्याःगु ब्वनेकुथिइ ऐतिहासिक सम्पदा संरक्षण, कला, संस्कृति व सहरी कृषियात अध्ययनया विषय दयेकेगु येँ महानगरपालिकाया योजना दु । नमुना विद्यालय संचालनया निंतिं न्हूगु विनियमावली आवश्यक जुइगुलिं व हे कथं ज्या न्ह्यानाच्वंगु येँ महानगरपालिकां धाःगु दु ।

येँ महानगर दुने दुगु ८९ गू सामुदायिक विद्यालय मध्ये येँ महानगरपालिकां ऐतिहासिक दरबार हाइस्कुल, भानु, संस्कृत व कन्या मावियात नमूना विद्यालय घोषणा यायेधुंकूगु दु । येँ महानगरपालिकां चालु आर्थिक दँया नीति व कार्यक्रमय् हे थ्व विद्यालतय्त नमुना विद्यालय घोषणा याःगु खः । थुगु विद्यालययात थप गुणस्तर व मेमेगु विद्यालयय् स्वयां थप कार्यक्रम संचालनया निंतिं थ्व दँय् १ करोड बजेट फ्याःगु दु । घोषणा याःगु थुपिं नमुना विद्यालयय् विशेष यानाः ऐतिहासिक सम्पदा, सहरी कृषि व कलाया आवश्यकता व महत्वया बारे विद्यार्थीतय्त अतिरिक्त ई मिले यानाः ब्वंकीगु खँ कामपाया शिक्षा सल्लाहकार रेशु अर्यालं कनादिल ।

सल्लाहकार अर्यालं धयादी, ‘नमुना विद्यालय जुइवं उगु विद्यालयय् मेमेगुलिं स्वयां फरक व गुणस्तरीय जुइ आवश्यक जुइ । थुकिया निंतिं येँ महानगरपालिकां ज्या यानाच्वंगु दु । ’
नमुना विद्यालयय् छु ब्वंकी ?

येँ महानगरपालिकाया नमुना विद्यालयय् ऐतिहासिक सम्पदा, कृषि व कलाबारे ब्वंकेगु येँ महानगरपालिकाया योजना दु । नमुना विद्यालय अन्तर्गत कन्या माविइ ऐतिहासिक सम्पदा व वातावरण संरक्षण गुकथं यायेगु धयागु बारे विद्यार्थीतय्त ज्ञान बी । ऐतिहासिक सम्पदाया संरक्षणं समाज व्यवस्थापनया निंतिं गुकथं ग्वाहालि जुइ, दैनिक जीवनय् प्राकृतिक सम्पदाया स्रोतं गुकथं प्रभाव लाकी, उकियात छाय् ल्यंका तयेमाः धयागु अध्यापन याकी ।

अथेहे संस्कृत विद्यालयय् सहरी कृषि कार्यक्रमयात गुकथं प्रभावकारी यायेफइ, गुगु झीगु न्हियान्हिथंया जीवनय् उपयोगी जुइ । सहरय् कुगाक्क खुला थाय् मदु, उकिं म्होचा जग्गाय् गुकथं कृषि यायेफइ धयागु स्यनी ।

अथेहे भानु माविइ धाःसा कला व संस्कृतिया विषयय् पठनपाठन याकेगु तयारी जुयाच्वंगु दु । लिपांगु इलय् कलाया आवश्यकता, थुकिया संरक्षण थेंज्याःगु विषय थुकी दुथ्याकीगु जुइ । थुकिया निंतिं ललितकलालिसे समन्वय यानाः न्ह्याः वनेगु कामपाया योजना दु ।

स्वयेबलय् सामान्य थें ताःसां थ्व स्वंगुलिं विद्यालयय् पठनपाठन याकीगु शिक्षा व्यावहारिक जुइगु विश्वास येँ महानगरपालिकाया दु । थुगु शिक्षा थप इलय् ब्वंकेगु याइ ।

गज्याःगु जुइमाः नमुना विद्यालय
नमुना विद्यालय मेमेगु विद्यालय स्वयां फरक जुइमाः । गन विद्यार्थीयात फरक कथंया क्रियाकलापय् दुथ्याकी । गुगु विद्यालय नमुना खः, अन प्रविधिया सहज पहुँच, गुणस्तरीय शिक्षा, आन्तरिक कार्यक्रम, विद्यार्थी संख्याया आधारय् आवश्यक विषयगत शिक्षक दरबन्दी थेंज्याःगु विषय अनिवार्य समावेश जुइ । आधुनिक पुस्तकालयया व्यवस्था, गुकिया कारणं नमुना विद्यालयत मेमेगु विद्यालय स्वयां गुणस्तरीय जुइफइ ।

रासस