येँ मनपाया ग्वाहालिं किपुली युद्ध स्मारक पार्क
येँ (नेपालभाषा टाइम्स) – येँ महानगरपालिकाया ग्वाहालिं किपुली युद्ध स्मारक पार्क दयेके ज्याः न्ह्याःगु दु । वि.सं. १८१४ निसें १८२२ तक यानाः स्वक्वः तक गोर्खाली सेना व किपूया सेना दथुइ ल्वापु जूगु किपुली उबलय्या युद्धया अवस्थायात क्यनीगु कथं ५४ रोपनी क्षेत्रफलय् पार्क दयेकेगु ज्या जुयाच्वंगु खः । थ्व पार्क दयेकेत येँ महानगरपालिकापाखें आर्थिक ग्वाहालि जूगु खः ।
पार्क दयेकाच्वंगु थाय् स्वयेगु निंतिं झाःम्ह येँ महानगरपालिकाया मेयर विद्या सुन्दर शाक्यं पार्कया ज्या मदिकुसे न्ह्याकेत इनाप यासें वइगु आर्थिक दँय् नं थ्व पार्कया निंतिं बजेट तयेगु खँ धयादीगु खः । पार्कयात कयाः किपू नगरपालिकाया मेयर रमशे महर्जनं धयादीगु दु, ‘थ्व युद्ध पार्कय् इतिहास जक मखु, नेवाः कलाः, संस्कृति न्ह्यब्वइगु मूर्ति, संग्राहल दयेकेगु योजना नं दु ।’ वय्कलं पृथ्वीनारायण शाह व कालु पाण्डेसहितया गोर्खालीं सेनां किपुली स्वक्वःतक आक्रमण याःगु खँ न्ह्यथँसें उबलय् जूगु युद्ध किपुमितय्गु निंतिं गर्व यायेबहःगु इतिहास जूगु खँ धयादिल । वय्कलं थन पार्क युद्धया झल्को बीगु कथं मूर्त अमूर्त स्मारक तयेगु जानकारी बियादीगु खः ।
थौंकन्हय् थ्व पार्कय् स्वीगुलिं मल्याक मूर्ति सहित स्मारक दयेकेगु ज्या जुयाच्वंगु दु । इतिहास कथं थ्यमथ्यं १२ सय सैनिकसहित पृथ्वीनारायण शाहं किपुलिइ आक्रमण याःगु खः । निक्वः तक किपूया स्वसःम्ह सेनां शाहया १२ सयम्ह सेनाया प्रतिकार यासें गोर्खाली सेनाया कालु पाण्डेयात स्यनाबिउगु खःसा पृथ्वीनारायण शाहयात नं छक्वः थःगु कब्जाय् काःगु खः । उबलय् किपूया सेनां कब्जाय् काःगु गोर्खा सेनाया ढाल, तरवार आदि बाघभैरव देगलय् अझं तयातःगु क्यनादिसें मेयर महर्जनं धयादीगु दु, ‘न्हापा किपू कृषिइ आधारित जुयाच्वंगु खः । घरेलु उत्पादनय् प्रख्यात दुगु खः, तर आः शहरीकरण लिसें किपूया थ्व पहिचान नं मदयावनेधुंकल ।’ वय्कलं इतिहासया संरक्षण यानाः किपूयात पर्यटकीय नगरी कथं विकास यायेगु योजना नगरपालिकाया दुगु खँ कनादिल ।
येँ म्हानगरपालिकाया मेयर शाक्य लिसें युद्ध पार्कया अनुगमन याःझाःम्ह किपूया मेयर महर्जनं युद्ध स्मारक पार्क किपूया इतिहास जीवन्त यायेगु योजना कथं हे दयेकागु खँ धयादिल । येँ महानगरपालिकाया मेयर शाक्यं हरियाली विकास, खुला क्षेत्रया संरक्षण, संस्कृति सम्पदाया संरक्षण व ऐतिहासिक धार्मिक व पर्यटकीय स्थानया विकास थेंज्याःगु परियोजनाय् थःपिंसं ग्वाहालि याना वयाच्वंगु खँ कनादिसें धयादीगु दु, ‘येँ महानगरपालिका थः जक मखु, जःलाखःलाय् लाःगु नगरलिसे नं साझेदारी यानाः न्ह्याःवनेमाः धयागु योजनाय् दु ।’
अनुगमन पुचलय् सहभागी किपू नगरपालिकाया उपमेयर सरस्वती रिजाल खड्कां सञ्चारकर्मीतलिसे खँ ल्हासें येँ महानगरपालिकाया प्रमुख शाक्यं पार्क दयेकेगु निंतिं आर्थिक ग्वाहालि बीगु प्रतिबद्धता प्वंकाः अभिभावकत्व मकाःगु जूसां थ्व पार्क दयेकेगु ज्या याउँक पूवनी मखुगु जुइ धयादीगु दु । वय्कलं थ्व पार्क दयेकेत थ्यंमथ्यं न्हय्गू करोड खर्च जुइगु अनुमान दुगु खँ कनादीगु दु। किपूया १, २ व १० वडाय् लाःगु थ्व पार्कय्न्हा पांगु चरणय् १४ रोपनी जग्गाय् ज्या यायेगु व लिपा बुलुहुं ५४ रोपनीइ हे पार्क दयेकेगु नगरपालिकाया योजना दु ।
LEAVE YOUR COMMENTS