ने. सं. ११४३ तछलाथ्व दशमी -

थौं अन्तर्राष्ट्रिय मांभाय् दिवसया थीथी ज्याझ्वः

येँ -थौं अन्तर्राष्ट्रिय मांभाय् दिवस । संयुक्त राष्ट्र संघीय निकाय युनेस्कोपाखें हरेक दँया फेब्रुअरी २१ तारिखयात विश्वन्यंकं मांभाय् दिवस कथं हनेगु निर्णय यानातः कथं थौं थ्व दिवस हनाच्वंगु खः ।

थ्व दिवसया लसताय् थौं नेपाः लिसें विश्वया थीथी थासय् थीथी ज्याझ्वःत यानाच्वंगु दु । मांभाय् दिवसया लसताय् म्हिगः नेपाल प्रज्ञा प्रतिष्ठानय् विश्वया मातृभाषा सम्बन्धी छगू विशेष ज्याझ्वः जुल । युनेस्को नेपाः व भाषा आयोगया ग्वसालय् उगु ज्याझ्वः खः । ज्याझ्वलय् थीथी विज्ञपिंसं मांभाय् सम्बन्धी ज्यापौ न्ह्यब्वयादीगु खः । थौं प्रज्ञा प्रतिष्ठानया हे ग्वसालय् बहुभाषिक कविता गोष्ठी नं यायेत्यंगु दु ।

थ्व लसताय् थौं थनया कामपा २५ वडाया स्थानीयवासीपिं पाखें नं छगू विशेष ज्याझ्वः यायेत्यंगु दु । उकी साहित्य, संगीत न्ह्यब्वयेगु लिसें न्वचुया ज्याझ्वः जुइ । थौं हे वल्र्ड नेवाः अर्गनाइजेशनपाखें नं बहनी छगू भच्र्युयल ज्याझ्वः यायेगु ग्वसाः जुयाच्वंगु दु ।

नेपाःस्थित बंगलादेशी राजदूतावासं नं थुकिया लसताय् विशेष ज्याझ्वः यायेत्यंगु दु । अन्तर्राष्ट्रिय मांभाय् दिवसया उत्पत्ति बंगलादेशय् जूगु कारणं अन थ्व न्हियात विशेष कथं हनेगु याना वयाच्वंगु दु ।

येँ महानगरपालिका दुनेया सामुदायिक विद्यालयय् स्थानीय पाठ्यक्रम ब्वंकीपिं नेवाः स्यनामितय्सं नं थौं अन्तर्राष्ट्रिय मांभाय् दिवसया लसताय् मांभाय्या महत्व बारे स्यनेकने व विशेष ज्याझ्वःत यायेत्यंगु खँ सीदुगु दु ।