थप ३३१म्हेसित कोरोना संक्रमण, ख्वपय् ७म्ह, येँय् १म्ह

येँ – स्वनिगलय् ८ म्ह नापं थप ३ सय ३१ म्हेसित कोरोना संक्रमण जूगु दु । येँया शुक्रराज ट्रपिकल अस्पतालय् याःगु परीक्षणय् ख्वपया ७ म्ह मिसा व राष्ट्रिय जनस्वास्थ्य प्रयोगशालाय् याःगु परीक्षणय् येँया १ म्ह मिसायात कोरानाया संक्रमण पुष्टि जूगु दु ।

स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमया कथं वंगु नीप्यघौया दुने ४९ म्ह मिसा व २ सय ८२ म्हेसित संक्रमण जूगु दु । थ्व नापं नेपालय् संक्रमित जूपिं ८ हजार ६ सय ५ म्ह थ्यंगु दु । उकी मध्ये ७ सय ५६ म्ह मिसात खःसा ७ हजार ८ सय ४९ म्ह मिजंत खः ।

अथेहे वंगु नीप्यघौया दुने १ सय ७६ म्ह कोरानामुक्त जूगु दु । नेपालय् कोरोनामुक्त जुयाः अस्पतालं डिस्चार्ज जूपिं १ हजार ५ सय ७८ म्ह थ्यंगु दु ।