गुंगू भाय्या सफू गुम्हेस्यां विमोचन

येँ – नांजाःम्ह उद्यमि लिसें कवि बसन्त चौधरीं थःगु ६१ दँ बुन्हिया लसताय् थःगु कविता मुना ‘वसन्त’ छक्वलं गुंगू भासं अनुवाद यानाः म्हिगः विमोचन यानादिल । थ्व गुंगू सफू मध्ये खस नेपाली भाषाया नेपाल प्रज्ञा प्रतिष्ठानया कुलपति गंगाप्रसाद उप्रेति, नेपालभाषाया जनकवि दुर्गालाल श्रेष्ठ, अंग्रेजीया भुवन ढुंगाना, मैथिलीया डा. रामअवतार यादव, भोजपुरीया ध्रुवचन्द्र गौतम, हिन्दीया डा. उषा ठाकुर, तामाङया अमृत योञ्जन, बंगालीया नूपुर भट्टचार्य व मारवाडीया पंडित मानवेन्द्र शर्मां विमोचन यानादीगु खः ।

फुक्कं सफूया समीक्षा यासें साहित्यकार अभि सुवेदीं देशय् ल्हाइगु थीथी राष्ट्र भासं थथे छक्वलं सफू पिकायेगु ज्या ला थौं संघीय व्यवस्था वयेधुंकाः राज्यया थीथी सरकारी निकायतय्सं यायेमाःगु खः, तर थौं छम्ह व्यक्तिं थज्याःगु ज्या याःगुलिं थ्व सकस्यां लागिं शिक्षा जुइ धयादिल । ज्याझ्वलय् थीथी भाय्या कविता मञ्चन यायेगु ज्या नं जूगु खःसा उकी नेपालभाषाया कविताय् मय्जु नस्वाः जोशीं न्ह्यब्वयादीगु खः ।