रेल बन्द जुइवं रेलया लीकय् हाट बजार
येँ- भारतया जयनगरंनिसें नेपाःया जनकपुर तक चले जुइगु रेल दँ बन्द जुइवं स्थानीय मनूतय्सं रेलया लीकय् हे पसः तयाः बजाः दयेका बिउगु दु । थौंकन्हय् उगु रेलया लीकय् हाट बजार हे सञ्चालन जुयाच्वंगु दु । आः सरकारं अन हानं रेल चले यायेगु निर्णय यायेवं प्रशासनं रेलया लीकय् सञ्चालन यानातःगु हाट बजार चीकेगु अभियान न्ह्याकूगु दु ।
जनकपुरधाम उपमहानगरपालिकाया वडा १ स्थित सीता चोकय् च्वंगु रेलवे लीकय् हे हाट बजार चायेका तःगु खः । आः नेपाल रेलवे कम्पनीं उगु हाट बजार चीकेगु ज्या न्ह्याकूगु खः । बजाः मचीकल धाःसा रेल चले याये मफइगु जूगुलिं बजाः चीकेगु ज्या निं शुरु याःगु खः ।
रेलवे कम्पनीं आः वइगु फागुन महिनांनिसें हे अन हानं चले यायेगु तयारी याःगु खः । कम्पनीं धाः कथं थौंकन्हय् सीता चोकय् जक मखु जनकपुरया मेमेगु थासय् नं रेलया लीकय् बजाः चायेकातःगु दु । थ्व बजाः चीकेगु लागिं हे प्रशासनयात थाकुयाच्वंगु दु ।
तर अन पसः तयाच्वंपिं व्यापारीतय्सं धाःसा थःपिंत अनं चीकेगु खःसा मेथाय् विकल्प बीमाः धकाः माग यानाच्वंगु दु । उकिं प्रशासनं रेलवे लीकया बजाः चीकेगुया नापनापं थ्व बजाः सारे यायेगु वैकल्पिक थाय् समेत मालाच्वंगु दु । थुकिया लागिं स्थानीय जनप्रतिनिधि, व्यापारी व स्थानीय मनूतलिसे नं सहलह यानाच्वंगु दु । हाट बजाः चीकाः आः जनकपुर रेलवे स्टेशनया नापसं च्वंगु रेलवे कम्पनीया हे जग्गाय् बजाः सारे यायेगु बारे बिचाः जुयाच्वंगु खँ नं धाःगु दु ।
थ्व रेल चले यायेत सरकारं भारतपाखें निगू सेट रेल न्याना कायेधुंकाः नं चले धाःसा याये मफयाच्वंगु खःसा आः थ्वहे फागुन १ गतेनिसें चले यायेगु तयारी जुयाच्वंगु दु ।
LEAVE YOUR COMMENTS