विलाशी ज्वलं पनेत पंगः
व्यापारीतय् दबाबं विलाशी ज्वलंया आयात पने मफुत
येँ – देय्या व्यापार न्हियान्हिथं अप्वया वंगुलिं आः विलाशी सामानया आयात पनेगु धकाः सरकार दुने खँ पिहां वःसां अज्याःगु सामान आयात याइपिं व्यापारीतय्गु कारणं सरकारयात थ्व निर्णय यायेत धाःसा थाकुयाच्वंगु खँ सीदुगु दु । वंगु दँया न्याला व थ्व दँया न्यालाया तुलना यायेबलय् थ्व न्याला दुने न्हापा स्वयां झन् हे अप्वः विलासी सामान दुहां वयाच्वंगुलिं आः उकियात नियन्त्रण यायेमाःगु सुझाव अर्थविद्–तय्सं सरकारयात बिउगु खः ।
तर सरकारं थ्व सुझावयात सकारात्मक रुपं काःसां नं अज्याःगु सामान झिके याइपिं व्यापारीतय्गु दबाबं यानाः निर्णय यायेत थाकुयाच्वंगु खँ सूत्रं धाःगु दु । विदेशं आयात जुइगु विलाशी सामान धकाः सरकारं विशेष यानाः थिके थिकेगु गाडीयात काःगु दु । लिसें टिभी, मोबाइल, कम्प्युटर थेंज्याःगु ज्वलंयात नं विलाशी ज्वलंया रुपय् काःगु दु ।
अथे हे सर्वसाधारणं नइगु स्वयां थिकेगु जाकियात नं थ्वहे धलखय् लाकूगु दु ।राष्ट्र बैंकया छगू तथ्यांक कथं वंगु न्यालाया दुने नेपालय् ४८ अर्ब तकाया मोटर व मोटरया सामान आयात जूगु दु । मोटरया आयात अप्वया वनेवं उकिया लिच्वः कथं पेट्रोलियम पदार्थया आयात नं अप्वया वंगु दु ।
वंगु न्यालाया दुने पेट्रोलियम पदार्थया आयात ३२ अर्ब तकाया जूगु दु । थ्व वंगु दँया न्याला दुने आयात जूगु स्वयां आपालं यक्व दु । वंगु न्यालाया तुलनाय् थुगु दँया न्याला दुने जाकिया आयात जक ३९ प्रतिशतं थहां वंगु दु । छखे विदेशं वइगु सामानया आयात थुभनं थहां वनाच्वंगु दुसा मेखे नेपाःया सामान धाःसा मुक्कं ३७ अर्ब तकाया जक विदेशय् निर्यात जूगु दु ।
थ्व धइगु आयात व निर्यात दथुया तःधंगु हे ‘ग्याप’ जूगु कारणं थुकियात न्ह्याथे यानाः नं पने माःगु बिचाः अर्थविद्तय्सं तया हःगु दु । आःया लागिं सरकारं भन्सार अप्वयेकेगु वा कोटा तोके यानाः जक सामान हये दइगु व्यवस्था याःसां गाःगु खँ नं उमिसं धाःगु दु ।
विदेशं नं पनीगु हे खः
थःगु देशं निर्यात जुइगु सिबें विदेशं आयात जुइगु तसकं अप्वया वन धाःसा थिके थिकेगु सामानया आयात पना बीगु ज्या नेपाःया जःलाखःला देतय्सं नं इलय् ब्यलय् याःगु दु । खास यानाः भारत व श्रीलंकां थःपिनि व्यापार घाटा अप्वया वनेवं लुँ व गाडीया आयात छुं ईया लागिं बन्द याना बिउगु खः ।
अज्याःगु प्रतिबन्ध सदांया लागिं मखुसें छुं ईया लागिं लागू यानाः लिपा व्यापार घाटा सन्तुलनय् वयेवं हानं फुकवा याःगु खः । अथे मजुल धाःसा विदेशी मुद्रा सञ्चितिं धाने मफया वनीगु खँ धाःगु दु ।
LEAVE YOUR COMMENTS