जनपथ माविइ मांभाय् दिवस

येँ (नेपालभाषा टाइम्स)- अन्तर्राष्ट्रिय मातृभाषा दिवसया लसताय् येँ मनपा १४ वडाय् च्वंगु जनपथ माध्यमिक विद्यालयय् बहुभाषिक साहित्य गोष्ठी जुल । ज्याझ्वलय् पाहां कविपिं लिसें विद्यालयया शिक्षक व विद्यार्थीतय्सं थीथी भासं साहित्य वाचन लिसें म्ये व हुलाप्याखं न्ह्यब्वःगु खः । ज्याझ्वलय् पाहां साहित्यकारपिं सन्दिप काफ्लें संस्कृत भासं, इश्वर थोकरं तामाङ भासं व सुरेश किरण लिसें सुजना श्रेष्ठं नेपालभाषां कविता पाठ यानादीगु खः । अथे हे विद्यालयया शिक्षकपिं आइती घले, मिनामाया न्यौपाने, सुरेन्द्र देवकोटापिंसं खस नेपाली भासं व नेवाः स्यनामि रश्मि नापितं नेपालभाषां कविता पाठ यानादीगु खः ।

उकथं हे विद्यालयया विद्यार्थीपिं जेनिशा योन्जन, आशिका तामाङ, सद्रब्रिना तामाङ, राज बुलुन, अनिशा श्रेष्ठ, साहिल राजा, रिंकी शर्मापिंसं नेपाली, नेपालभाषा, तामाङ, भोजपुरी, मैथिली व उर्दू भासं रचना पाठ यानादीगु खः । लिसें विद्यार्थीतय्सं थीथी भाय्या म्येय् हुलाप्याखं नं न्ह्यब्वःगु खः ।

शिक्षा विकास तथा समन्वय इकाइ काठमाडौंया प्रमुख विचारी प्रसाद अधिकारी मूपाहांकथं झाःगु उगु ज्याझ्वःया सभापतित्व विद्यालयया प्रधानाध्यापक जीतबहादुर लामिछानें यानादीगु खःसा सहायक प्रधानाध्यापक किरणशाली घिमिरें लसकुस यानादीगु खः ।