लोडशेडिङ चीकेत शाक्यया नं ल्हाः दु

येँ- नेपाल विद्युत प्राधिकरणया कार्यकारी निर्देशक पदय् हितेन्द्रदेव शाक्य नियुक्त जुयादीगु दु । थ्व स्वयां न्ह्यः वय्कलं उगु पदय् कामु कार्यकारी जुयाः ज्या यानादीगु खः । सोमवाः च्वंगु मन्त्रिपरिषद् बैठकय् प्रधानमन्त्री केपी ओलीं तप्यंक तयादीगु प्रस्तावपाखें शाक्य कार्यकारी निर्देशक नियुक्त जुयादीगु खः ।

प्राधिकरणया कार्यकारी निर्देशक पदय् च्वनादीम्ह कुलमान घिसिङया कार्यकाल क्वचायेवं उगु पद खाली जुयाच्वंगु खः । अन घिसिङयात हे हानं मेगु कार्यकाल तयाः ज्या याकेमाः धकाः जनस्तरपाखें समेत दबाब वःगु खःसां प्रम ओलीं उकियात वास्ता मयासे शाक्ययात नियुक्त यानादीगु खः ।

न्हूम्ह कार्यकारी निर्देशक शाक्य येँया स्थायी निवासी खः । यदि प्राधिकरणय् कुलमानयात महयेगु खःसा आः प्राधिकरणय् दुपिं निर्देशकत मध्ये दकलय् वय्कः हे दकलय् उपयुक्त खः धाःगु दु । कुलमान घिसिङं लोडसेडिङ चीकेगु लागिं धकाः दयेकूगु टीमय् च्वनाः शाक्यं नं ज्या यानादीगु खः । सर्वसाधारण मनूतय्सं लोडशेडिङ चीकेगु ज्याय् कुलमानया भूमिका दु धकाः धायेगु खःसां पर्दा लिउने च्वनाः वय्कःयात यक्वस्यां ग्वाहालि याःगु दुसा अथे ग्वाहालि याःपिं मध्ये शाक्य छम्ह प्रमुख खः ।

सूत्रतय्सं धाःकथं प्राधिकरणय् लोडशेडिङ चीकेगु लागिं दकलय् न्हापां डिजाइन तयार याःम्ह अधिकृत कन्हैयाकृष्ण मानन्धर खः । तर राजनीतिक समीकरणया झ्वलय् कन्हैयाकृष्णयात महसे कुलमान घिसिङयात कार्यकारी निर्देशक नियुक्त यायेवं कन्हैयाकृष्णं प्राधिकरण हे त्वःतादीगु खः ।

शाक्यया नियुक्ति लिपा कामचलाउ प्रधानमन्त्रीं सार्वजनिक निकायय् पदाधिकारी नियुक्त याये मजिउ धकाः नं सः तयाहःगु दु ।

सम्बन्धित बुखँ

LEAVE YOUR COMMENTS