खुसि व सतक पीडिततपाखें सतकय् संघर्ष व अदालतय् कानुनी लडाइँ यायेगु तयारी
येँ (नेपालभाषा टाइम्स)÷स्वनिगः दुनेया बागमति, बिष्णुमति व मनोहरा खुसि सिथय् ४० मिटर क्षेत्र तक छेँ दने दइ मखु धकाः सर्वोच्च अदालतं बिउगु आदेश व उकियात कार्यान्वयन यायेगु धकाः येँ मनपां याःगु निर्णय विरुद्ध आन्दोलन यायेगु लागिं पीडिततय्सं संघर्ष समिति गठन याःगु दु । शुक्रवाः येँय् जूगु छगू वृहत् मुँज्यां अभियन्ता सुमन साय्मिया अध्यक्षताय् ५१ म्ह दुजः दुगु संघर्ष समिति गठन याःगु खः ।
मुँज्याय् सडक विस्तारपाखें पीडित जूपिं लिसें बालाजुइ छेँ थुना बिउगुलिं पीडित जूपिनि नं उपस्थिति दुगु खः । संघर्ष समितिं थ्व पीडितपिं सकसितं नापं तयाः मंकाः संघर्ष न्ह्याकेगु तयारी याःगु दु । मुँज्याय् न्ववासें बागमति प्रदेशया पुलांम्ह मन्त्री लिसें सांसद शैलेन्द्र वज्राचार्यं सर्वोच्चया फैसला झीसं पालना यायेमाः खःसां थुकिं जनतायात मार लाकीगु जूगुलिं उकियात हिलेत दबाब बीमाः धयादिल ।
अधिवक्ता जितेन्द्र वज्राचार्यं सर्वोच्चं याःगु फैसला व्यक्तिया मानव अधिकार व सम्पत्तिया अधिकार सम्बन्धी संविधानं बियातःगु धाराया अःखः जूगुलिं थुकिया विरुद्ध सकलें छप्पँ जुयाः सर्वोच्चय् पुनरावेदन याकेमाः धयादिल ।
अथे हे अभियन्ता शान्तप्रकाश श्रेष्ठं गबलें सडक, गबलें खुसि, गबलें पार्क दयेकेगु नामय् थनया आदिवासी नेवाःतय्त सखाप हे याना छ्वयेगु सुनियोजित षडयन्त्र जुयाच्वंगुलिं थुकी सकलें सतर्क जुइमाः धयादिल ।
अथे हे अभियन्ता शैलेश शाक्यं सर्वोच्चं याःगु गलत फैसलायात येँ महानगरपालिकां साथ बिउगु खँ कँसें उकियात विरोध यायेमाः धयादिल । ज्याझ्वलय् मेपिं नं आपालं पीडिततय्सं नुगःखँ तयादीगु खः ।
अभिन्यता सुमन साय्मिं थ्व आदेश विरुद्ध पुनरावेदनय् वनेगु खःसां नं याकःबाकः वनाः ज्या जुइ मखु, थुकिया लागिं संघर्ष यायां हे अदालतया लुखा नं घ्वाः वनेमाःगु खँ कनादिल । स्वनिगःया नेवाःतय्के दनिगु अन्तिम सम्पत्ति धइगु भूमि हे जक खः धासें वय्कलं धयादिल, ‘आः नेवाःतय्त थ्व अन्तिम सम्पत्तिपाखें नं विस्थापित यायेत स्वयाच्वंगु दु । थुकियात पने मफुत धाःसा थनया आदिवासीत समाप्त जुइ ।’
संघर्ष समितिं आः छसिकथं ज्याझ्वः दयेका यंकीगु खँ धाःगु दु ।
LEAVE YOUR COMMENTS