आः बागमती प्रदेशया सरकार क्वःदली

येँ -नेकपा एमाले बागमति प्रदेसया सांसद राजेन्द्र पाण्डें आः बागमति प्रदेशया सरकार नं हिले फइगु खँ धयादीगु दु । वय्कलं म्हिगः पत्रकारतलिसे खँ ल्हायेगु झ्वलय् उगु खँ धयादीगु खः ।

वय्कलं धयादिल, ‘थ्व स्वयां न्हापा चर्चा जूम्ह व्यक्ति आः मुख्यमन्त्री जुइ, केन्द्रीय राजनीतिइ हिउपाः वयेवं आः उकिया लिच्वः प्रदेशय् नं खने दइ । अथे जुयाः आः बागमति प्रदेशय् नं मुख्यमन्त्री हिली, थ्व स्वाभाविक प्रक्रिया खः । प्रदेशया सरकार हिलेगु थौंया आवश्यकता खः ।’

वय्कलं प्रदेशया राजनीतिक गतिविधि सञ्चालनया निंतिं थः तयारी अवस्थाय् दुगु व केन्द्रीय नेताया निर्देशन पियाच्वनागु खँ धासें प्रदेश सरकारयात ल्यंकेगु निंतिं थ्व स्वयां न्ह्यः जूगु सहमति व सहकार्ययात मुख्यमन्त्री डोरमणि पौडेलं वेवास्ता याःगुलिं थःगु पक्षया सांसदपिं आः मेगु हे लँपुइ वनेगु तयारी जुयाच्वंगु खँ नं धयादीगु दु ।

वय्कलं नेकपा एमाले छप्पँ जुयाच्वन धाःसा मुख्यमन्त्री व मन्त्रीत नं कायम जुइगु खँ धासें धयादिल, ‘एमालेया एकता कायम जुत्तले आःया मुख्यमन्त्री व मन्त्रीत कायम जुइ, मखुसा मेगु हे पार्टी नीस्वनाः गठबन्धनया सरकार दयेकेत जिपिं बाध्य जुइफु ।’

बागमती प्रदेशय् एमाले तज्यानाः सकलें विपक्षी छथाय् च्वन धाःसा मुख्यमन्त्री डोरमणि पौडेलया सरकार अल्पमतय् लाइकथंया समीकरण दु ।