हरिशंकर देगः पुनःनिर्माण आकिवं क्वचाइगु

यल – थनया लाय्कू लागाय् च्वंगु हरिशंकर देगः आकिवं तकया दुने दयेके क्वचायेकेगु लक्ष्य काःगु दु । यल लाय्कू लागाया महत्वपूर्ण स्मारमध्ये छगू हरिशंकर देगलय् थौंकन्हय् धमाधम ज्या जुयाच्वंगु व आकिवं तकया दुने निर्माण सम्पन्न यायेगु लक्ष्य काःगु खः ।
देगःया क्वय्या तँया ज्या सिधयेधुंकूगु व च्वय्या तँय् थौंकन्हय् धमाधम ज्या जुयाच्वंगु पाटन स्मारक तथा दरवार हेरचाह ज्याकुथिं न्ह्यथंगु दु ।

उगु ज्याकुथिं देगः निर्माणया ज्या तीव्र रुपं जुया वनाच्वंगुलिं आकिवं तकया दुने निर्माण सम्मन्न जुइगु दावी याःगु दु । ज्याकूया प्रमुख काजीमान प्याकुरेलं कनादीकथं २०७२ साल बैशाख १२ गते तःभुखाय् ब्वःगु दछि लिपा यल लाय्कू लागाया मेमेगु स्मारकस्थललिसें उगु देगः नं पुनःनिर्माण यायेगु ज्या न्ह्याकूगु खः ।

भुखाचं हरिशंकर देगः पूर्ण रुपं क्षतिग्रस्त जूगु खः । स्वतँ जाःगु उगु देगः पुनःनिर्माणय् अप्वःथें पुलांगु हे ज्याख्यलय् वःगु सामग्री प्रयोग यानाः दयेकेगु ज्या जुयाच्वंगु दु । उगु देगः काठमाडौं उपत्यका संरक्षण कोष (केभिपिटीं) निर्माण यानाच्वंगु खःसा केभिपिटीं निर्माण यानाच्वंगु यल लाय्कूया महत्वपूर्ण झिंनिगू स्मारक मध्ये हरिशंकर देगः नं छगू प्रमुख खः ।

ज्याकूया प्रमुख प्याकुरेलं थ्व स्वयां न्ह्यः पुनःनिर्माण जूगु झिगू सम्पदा क्वचाये धुंकूगु व हरिशंकर देगःलिसें मेगु प्यम्ह नारायण द्यःया देगः जिर्णोद्वार जुयाच्वंगु जानकारी बियादीगु दु ।हरिशंकर द्यःयात हिन्दू समुदायं बछि शिव व बछि विष्णुया रुपय् कायेगु याना वयाच्वंगु दु । थुगु देगं थनया मेमेगु सम्पदा व स्मारकस्थल थें हे झिंच्यागूगु शताब्दीइ दयेकूगु धइगु अनुमान यानातःगु दु ।

यलया तत्कालीन मल्ल जुजु योग नरेन्द्र मल्लया म्ह्याय्चं थुगु देगः दयेके बिउगु धइगु इतिहास दु । विश्व सम्पदाया धलखय् दुथ्यानच्वंगु यल लाय्कुलिइ भुखाचं क्षतिग्रस्त जूगु स्मारक दयेकेगु झ्वलय् केभिपिटीं छगू लिपा मेगु स्मारकत दयेकेगु ज्या सिधयेका वयाच्वंगु दुसा उखे सरकारी निकाय गुथि संस्थानं ठेकेदारयात जिम्मा बियाः दयेके बियाच्वंगु स्मारकया ज्यां धाःसा सन्तुष्ट जुइक गति काये फयाच्वंगु मदु ।