ज्यापु महागुथि नेपाः महानगर समितिया एकीकृत अधिवेशन

येँ- ज्यापु महागुथि येँ महानगर समितिया एकीकृत अधिवेशनं न्हूगु ज्यासना पुचः ल्यःगु दु । वंगु आइतवाः जूगु निर्वाचनं पंचनारायण महर्जनया नेतृत्वय् येँ महानगर समितिया न्हूगु ज्यासना पुचः ल्यःगु खः ।

निर्वाचनय् महर्जनं ३६० मत प्राप्त यानादीगु खःसा वय्कःया निकटतम प्रतिद्वन्द्वी न्हुछेकाजी महर्जनं १७१ व मेम्ह प्रत्याशी सुरेन्द्र महर्जनं ८ मत प्राप्त यानादीगु खः ।

अथे हे सचिवय् मचाराजा महर्जन (किलाघः) ३२४ मत हयाः विजयी जुयादीगु दुसा वय्कःया निकटतम प्रतिद्वन्द्वी शर्मिला सुवाल डंगोलं २०६ मत हयादीगु खः । कोषाध्यक्षय् जुजुकाजी महर्जन ३६१ मत विजयी जुयादगिु दुसा वय्कःया प्रतिद्वन्द्वी राजुरत्न महर्जनं १२४ मत हयादीगु खः ।

उपाध्यक्षय् कृष्णनारायण महर्जन व मिसा उपाध्यक्षय् नानीहिरा महर्जन प्रजापति, सहसचिवय् रजिना डंगोल व सह कोषाध्यक्षय् नानीहेरा डंगोल निर्विरोध निर्वाचित जुयादीगु दु ।

थुकथं हे खुल्ला दुजलय् श्यामकृष्ण प्रजापति, राजन महर्जन, श्रीकृष्ण महर्जन, कृष्ण महर्जन दिपक डंगोल, श्याम महर्जन, कुलनारायण डंगोल, सूर्यमान महर्जन व दिनेश महर्जन व मिसा दुजःपाखे विद्यालक्ष्मी डंगोल, विमला महर्जन (डंगोल), कमला महर्जन, सजनी महर्जन व सुनिता महर्जन डंगोल निर्वाचित जुयादीगु दु ।

अधिवेशनया न्हापांगु दिं बसन्तपुलिइ समितिया नायः बाबुराजा महर्जनया सभापतित्वय् जूगु खः ज्याझ्वलय् मूपाहांकथं बागमति प्रदेशया खानेपानी, सिँचाइ व उर्जामन्त्री वसन्तप्रसाद मानन्धर झायादीगु खः । ज्याझ्वलय् ज्यापु समुदायया थीथी व्यक्तित्वलिसें त्वाः खलःयात हनेज्या नं याःगु खःसा लुमन्ति पौ नं पितब्वज्या याःगु खः ।

उलेज्या लिपा बन्दसत्रय् सचिव ई. सानुकाजी महर्जनं न्ह्यब्वयादीगु प्रगति प्रतिवेदन व कोषाध्यक्ष ई. हेराकाजी महर्जन आर्थिक प्रतिवेदन न्ह्यब्वयादीगु खः ।