पूर्वी नेपाःया अस्पतालय् भारतीय विरामीया भीड

येँ- पूर्वी नेपालया थीथी नगरय् चायेकातःगु थीथी मिखा अस्पतालय् थौंकन्हय् नेपाःमि स्वयां नं भारतया थीथी लागां वइपिं विरामीतय् भीडं अप्वःगुलिं आः अन भारतया थीथी भाय् सःपिं कर्मचारी नियुक्त याये माःगु अवस्था पिहां वःगु दु ।

पूर्वी नेपाःया मेची, विराटनगर, चौधरी आदि मिखा अस्पतालय् थौंकन्हय् भारतया विहार, पश्चिम बंगाल व आसामया भारतीय नागरिकत वासः याकेत वइगु जुयाच्वंगु दु ।

नेपाःया अस्पतालतय्सं भारतीय विरामीतय्त छुं हे कथंया थप शुल्क मकाइगु जूगुलिं उपिं भारतय् स्वयां नं सीमा लागाय् लाःगु नेपाःया अस्पतालय् हे वये ययेकाच्वंगु खँ धाःगु दु । भारतय् वन धाःसा नेपाः लगायत विदेशी विरामीतय्त धाःसा थप शुल्क कायेगु याइ । नेपाःया सेवा बांलाःगु जुयाः भारतया विरामीत ग्वाःग्वाः हे नेपाःपाखे वयेगु यानाच्वंगु खः ।

भारतया विरामी अप्वः वइगु जुयाः थौंकन्हय् पूर्वी नेपाःया आँखा अस्पतालतय्सं कर्मचारी भर्ना याइबलय् खस नेपाली भाय्या नापनापं बंगाली, असामी व हिन्दी भाय् नं सःपिं जक कायेगु याना हःगु दु । कर्मचारी भर्ना काइबलय् उमित थुपिं नं भाय् सः ला धकाः न्यनीगु व सःपिंत प्राथमिकता बियाः जागीर बीगु यानाच्वंगु दु ।

सूत्रया कथं भारतया विरामीत अप्वः वःगुलिं निजी अस्पतालतय्त लबः नं जुयाच्वंगु दु । उकिं नं उमिसं थप शुल्क मकाःगु खः धाःगु दु ।

सम्बन्धित बुखँ

LEAVE YOUR COMMENTS