नेपाःया किपाग्राफी पुचः चीनपाखे

ख्वप – भक्तपुर किपाग्राफी पुचःया छगू प्रतिनिधिमण्डल चीनय् न्ह्यानाच्वंगु अन्तर्राष्ट्रिय किपाग्राफी सम्मेलनय् ब्वति कायेत उखेपाखे वंगु दु । थ्व हे कात्तिक १ गतेनिसें ५ गतेतक न्ह्याइगु सम्मेलनय् ब्वति कायेत पुचःया नायः अच्युत प्रजापतिया नेतृत्वय् स्वम्हेसिया प्रतिनिधिमण्डल उखेपाखे वंगु खः ।

पुचःया नायः प्रजापतिया नेतृत्वय् उपाध्यक्ष पद्मसुन्दर शाक्य व दुजः सम्पदा वज्राचार्यसहित स्वम्हेसिया टोलि सम्मेलनय् ब्वति कायेत वंगु खः । चीनया पर्यटन तथा संस्कृति मन्त्रालयनापं पेकिङ नगरपालिकाया ब्वनाय् उगु पुचः वंगु खः ।

पुचःया नायः प्रजापतिं बियादीगु जानकारीकथं सम्मेलनया उलेज्याझ्वलय् थीथी देशं प्रतिनिधित्व यानाः वःपिंसं संबोधन याइगु जानकारी बियादिसें सम्मेलनया निगूगु सत्रय् फोटोग्राफी फोरम व लिपांगु दिनय् सहभागि देय्या दथुइ फोटोग्राफरतय्सं कयातःगु थीथी किपाया ब्वज्या नं जुइगु ज्याझ्वः दु ।

चीन, नेपाः, श्रीलंका, रुस, सिंगापुर, अष्टे«लिया, इटलीनापं थीथी देशया फोटोग्राफरतय्सं ब्वति कयाच्वंगु सम्मेलनय दक्वं देय्या दथुइ सम्पदा, संस्कृति संरक्षण व उत्थानया निंतिं अवलम्बन यायेमाःगु उपायया निंतिं फोटोग्राफी सम्बन्धी ज्ञान, कला, सीपया बारे आदान प्रदानय् सम्झौता नं जुइ ।